AQSh-ta ólim jazasyna kesilgen qylmysker kúzetshi áıelmen birge qashyp ketti

NUR-SULTAN. QazAqparat – AQSh-tyń Alabama shtatynda ólim jazasyna kesilgen 38 jastaǵy retsıdıvıst Keısı Ýaıt túrmeden qashyp ketti, dep habarlaıdy QazAqparat BBC aqparat agenttigine silteme jasap.

Dál osy ýaqytta túrme qyzmetkeri Vıkkı Ýaıt ta joǵalǵan. Bılik qylmyskerdiń kúzetshini kepilge alýy múmkin ekenin nemese ol Ýaıtqa óz erkimen kómektesti degen nusqalardy qarastyrýda.

Qylmysker túrmeden juma kúni tańerteń qashqan. 56 jastaǵy Vıkkı Ýaıt retsıdıvıstti túrmeden ózi shyǵaryp, basshylyqqa ony psıhıatrǵa qaralýǵa apara jatqanyn aıtqan.

Keıin belgili bolǵandaı, bul kúni eshqandaı konsýltatsııa belgilenbegen. Al Ýaıttyń ózi hattamaǵa sáıkes áreket etpegen, erejege sáıkes túrmeniń syrtynda qaýipti qylmyskerdi eki kúzetshi birge alyp júrýi tıis.

Ýaıt áriptesterine qylmyskerdi sotqa qaldyryp, ózi dárigerge baratynyn aıtqan. Keıin onyń bul kúni dárigerge qaralmaǵany anyqtaldy. Onda Keısı Ýaıtty aparýy tıis sot psıhıatrynyń josparly saraptamasy da bolǵan joq.

Vıkı Ýaıt Alabamadaǵy túzeý departamentinde 25 jyl qyzmet atqaryp, Loderdeıl okrýgi túzeý departamenti dırektorynyń orynbasary bolǵan. Onyń jumysyna tutqyndardy sotqa jetkizý kiredi.

Kúzetshi men qylmysker túrmeden juma kúni tańǵy saǵat 9:00 shamasynda shyǵyp ketken, al tańǵy saǵat 11.00 kezinde onyń bos patrýldik kóligi saýda ortalyǵyndaǵy kólik turaǵynan tabylǵan.

Loderteıl okrýginiń sherıfi Sıngltonnyń aıtýynsha, Ýaıt túrmeden qashýdy 2020 jyly da josparlaǵan, biraq oıy iske aspady.