AQSh-ta oqyp júrgen otandasymyz Sangına Sháripova Los-Andjeleste kontsert berdi

ASTANA. QazAqparat – AQSh-ta bilim alyp júrgen qazaq qyzy Sangına Sháripova Los-Andjeleste kontsert berdi, dep habarlaıdy QazAqparat tilshisi.

Bul – otandasymyzdyń AQSh-taǵy alǵashqy kontserti. Búginde Sangına Sháripova Los-Andjelestegi mýzykanttar ınstıtýtynda bilim alyp jatyr. Ol usynǵan kontsert oqý orny stýdentteriniń arasyndaǵy konkýrstyń fınaly. Buǵan deıingi birneshe kezeńnen súrinbeı ótken ánshi Los-Andjelestiń beldi stýdııalarymen birge jumys isteý múmkindigin jeńip alý úshin synǵa tústi.

«Bul konkýrsqa qatysý úshin sońǵy 2,5 aıdyń ishinde óz betimshe mýyzkanttar taýyp, olardyń basyn qosyp top jasaqtadym. Birge daıyndalyp, ánderimdi óńdedik, qazaq sózderin aǵylshyn tiline aýdardym. Al búgin tanymal prodıýserler men menedjerlerdiń aldynda ónerimizdi kórsettik. Men úshin bul erekshe tájirıbe boldy», - dep málim etti Sangına Sháripova Jibek Joly telearnasyna bergen suhbatynda.

Konkýrsqa qatysýshylar 3 ánnen oryndady. Osy oraıda otandasymyz Sangına bir týyndynyń qaıyrmasyn qazaq tilinde shyrqady. Bul retti óner ıesin qoldaýǵa kelgen qazaqstandyqtar da az bolmady.

«Sangına qazirgi synaqta top jarady dep oılaımyn. Sebebi ol úlken notalardy alǵan kezde ony ulttyq, qazaqı ásem áýenderdiń ıirimimen baılanystyryp jatty. «Talaptyǵa nur jaýar», deıdi. Sáttilik tileımiz!», - dep pikir bildirdi ánshiniń kontsertin tamashalaýǵa barǵan Qazaqstannyń eńbek sińirgen ártisi Marat Omarov.