AQSh-ta maımyl sheshegine qarsy vaktsınanyń 800 myńdaı dozasy taratylmaq

NUR-SULTAN. QazAqparat - Amerıka Qurama Shtattarynyń bıligi jaqynda maımyl shesheginiń taralýymen kúresý úshin 800 myńǵa jýyq jańa vaktsına dozasyn elge taratamyz dep otyr, dep habarlaıdy QazAqparat COVID-19 taralýyna jol bermeý jónindegi vedomstvoaralyq komıssııaǵa silteme jasap.

«Qazirgi ýaqytta AQSh-tyń Azyq-túlik jáne dári-dármek sapasyn sanıtarııalyq qadaǵalaý basqarmasy (FDA) tıisti ruqsatty berý úshin jedel jumys istep jatyr. AQSh-ta maımyl sheshegi vırýsyn juqtyrý statıstıkasynyń ósýi yqtımal, bılik muny testileýdiń artýymen baılanystyrady. Qazirgi ýaqytta elde jeke kompanııalarmen kóbirek vaktsına shyǵarý múmkindigi týraly kelissózder júrgizilip jatyr», - delingen habarlamada.

Sondaı-aq, VAK málimetinshe, danııalyq Bavarian Nordic farmatsevtıkalyq kompanııasy preparatqa suranystyń ósýi aıasynda maımyl sheshegi vırýsymen kúresý úshin Imvanex vaktsınalaryn shyǵaratyn óz kásipornyn táýlik boıy jumys rejımine kóshirýge daıyndalyp jatyr. Kompanııa jylyna 30 mln doza vaktsına shyǵara alady. Kásiporyndaǵy jumys kúni qazirdiń ózinde uzaq.

Bavarian Nordic maımyl sheshegine qarsy preparat retinde Imvanex vaktsınasyna EO maquldaýyn aldy. Buryn Imvanex tek AQSh pen Kanadada maımyl sheshegine qarsy maquldanǵan bolatyn. Kompanııa vaktsınany maımyl sheshegine qarsy álemdegi jalǵyz dárilik qural dep ataıdy. Kásiporyn basshylyǵynyń pikirinshe, Bavarian Nordic-tiń óndiristik múmkindikteri Imvanex-ti búkil álemge jetkizýge múmkindik beredi, óıtkeni COVID-19-dan aıyrmashylyǵy, bul ınfektsııa jaǵdaıynda jappaı vaktsınatsııa qajet emes.