AQSh-ta Qazaq kúıi antologııasynyń tusaýkeseri ótti

VAShINGTON. QazAqparat – Qazaqstan Respýblıkasy Táýelsizdiginiń 30 jyldyǵyn merekeleý aıasynda AQSh-ta «Amanat» qazaq kúıi antologııasynyń tanystyrylymy ótti. Bul týraly QR Syrtqy ister mınıstrliginen málim etti, dep habarlaıdy QazAqparat.

Onlaın formattaǵy is-sharany Qazaqstannyń Vashıngtondaǵy Elshiligi men «Kaspıı saıasaty ortalyǵy» (Caspian Policy Center) birlesip uıymdastyrdy.

Tanystyrylymǵa «Saýap» qory Qamqorshylar keńesiniń tóraǵasy, Parlament Májilisiniń depýtaty Baqytbek Smaǵul, «Amanat» jobasynyń birlesken avtory Múslim Hasenov, sondaı-aq Amerıkalyq syrtqy saıasat jónindegi ulttyq komıtettiń (National Committee on American Foreign Policy) prezıdenti jáne bas atqarýshy dırektory Sıýzan M. Ellıott moderator retinde qatysty.

Elshi Erjan Ashyqbaev qazaq mádenıeti men ulttyq mýzykanyń erekshelikteri týraly, onyń ishinde dombyra men qobyzda kúı oryndaý ereksheligi, sondaı-aq «Amanat» jobasyna engen túpnusqalyq 500 muraǵattyq kúıler toptamasyn qamtıtyn USB qurylǵysy men ár shyǵarmanyń sıpattamasy bar qazaq, orys jáne aǵylshyn tilderindegi kitap týraly aıtyp ótti.

B. Smaǵul alǵy sózinde «Amanat» jobasy aıasynda Qazaqstan men kórshi elderdiń túrli arhıvteri men qorlarynan alynǵan biregeı mýzykalyq shyǵarmalar jınaqtalyp, tsıfrlandyrylǵanyn baıandady.

M. Hasenov bul jobanyń tanystyrylymy alǵashqy ret shetelde ótip jatqanyn jáne onyń danalary Vashıngton, Nıý-Iork, Boston jáne San-Frantsıskonyń iri kitaphanalaryna, sonyń ishinde AQSh Kongress kitaphanasyna tapsyrylǵanyn atap ótti.

Onlaın-kórermenderge dombyra, qobyz jáne sybyzǵyda oryndalǵan shyǵarmalard yń beınejazbalary usynyldy.