AQSh-ta qazaq dıasporasynyń basyn qosqan bıznes-forým ótti

SAN-FRANTsISKO. QazAqparat – AQSh-tyń San-Frantsısko qalasynda qazaq dıasporasynyń basyn qosqan bıznes-forým ótti. Іs-sharany «Otandastar Qory» KEAQ men QR-nyń AQSh-taǵy Elshiliginiń San-Frantsısko qalasyndaǵy QR Bas konsýldyǵy uıymdastyrdy, dep habarlaıdy QazAqparat.

Bıznes forým qordyń shet elde turatyn otandastarmen baılanysty jaqsarý jáne nyǵaıtýǵa baǵyttalǵan baǵdarlamanyń bir bóligi. Sharanyń basty maqsaty - AQSh-taǵy qazaq dıasporasy ókilderimen iskerlik qarym-qatynas ornatý.

«Otandastar qory» KEAQ Prezıdentiniń keńesshisi Bolat Dıdar is-shara barysynda qor qyzmetiniń negizgi baǵyttary, sondaı-aq sheteldegi dıasporamen jumys isteý jónindegi qordyń negizgi jobalarynyń biri - qazaq mádenı iskerlik úıiniń quramyna kiretin iskerlik úıleri men mádenı ortalyqtardyń álem boıynsha jelisin qurý jónindegi josparmen tanystyrdy. Onyń aıtýynsha, ortalyq qazaq mádenıeti men dástúrleriniń, ulttyq brendterdiń, tildiń taratýshysy bolmaq, sondaı-aq qazaqstandyq eksportty, ónimderdi taratýǵa járdemdesedi, naqty bıznes-kelisimsharttar jasaýǵa qatysyp, seriktesterdi, qyzyqty bıznes ıdeıalar men ınnovatsııalyq startaptardy izdestiredi.

Bıznes-forým barysynda qatysýshylar ózara is-qımyldy, bıznes-bastamalardy yntalandyrý men startaptardy qoldaý tetikterin egjeı-tegjeıli talqylady. Talqylaý barysynda amerıkalyq naryq bıznesiniń baǵytyn, atap aıtqanda ınnovatsııalyq tehnologııalar jáne ІT startaptarymen baılanysty jobalardyń úlken shoǵyryn, sonymen qatar Qazaqstannan shyqqan daryndylardyń Apple men Google tárizdi aldyńǵy qatarly kompanııalardaǵy jumysyn qaperge alyndy.

Forým jumysyna 100-den astam adam qatysty. Olardyń arasynda «Smart Advisory» JShS basqarýshy seriktesi, «QazAngels» venchýrlyq qor dırektory Rýslan Raqymbaı, «ABC-I2BF Seed Fund» ınnovatsııalyq startaptardy jetildirý boıynsha venchýrlyq qor basshysy Ánýar Seıfýllın, «Happycake Global» kompanııasynyń negizin qalaýshy jáne dırektory Ashat Soltanovtar da bar.

Forým sońynda «Otandastar qory» KEAQ Prezıdentiniń keńesshisi Bolat Dıdar AQSh-ta turatyn otandastardy qordyń qazaq úıiniń iskerlik jáne mádenı ortalyǵy ókilderin anyqtaýǵa belsendi qatysýǵa, sondaı-aq kezdesýge qatysýshylardy Túrkistan qalasynda ótetin otandastardyń birinshi forýmyna shaqyrdy.

Aıta keterligi, buǵan deıin dál osyndaı bıznes-forým, maýsym jáne shilde aıynda Mıýnhen men Ystanbul qalasynda ótken bolatyn. Aldaǵy ýaqytta Beıjiń qalasynda (QHR), Tashkent (Ózbekstan) pen Londonda (Ulybrıtanııa) ótedi dep josparlanǵan.

Forýmdar týraly barlyq aqparat qordyń áleýmettik jelilerdegi resmı paraqshalarynda bar.