AQSh-ta qasqyr-ıt náresteni óltirdi

<p>AQSh-tyń Alabama shtatynda úsh aılyq náresteni úı janýary &nbsp;&ndash; qasqyr men ıttiń býdany óltirdi. <a href="https://kaz.inform.kz/" target="_blank" rel="noopener">Kazinform</a> bul týraly <a href="https://www.bbc.com/news/world-us-canada-67619068" target="_blank" rel="noopener">BBC</a>-ge silteme jasap habarlaıdy.&nbsp;</p>

Bala beısenbi kúni janýar salǵan jaraqattan qaıtys boldy. Úı janýary sol jerde joıyldy.

«Chelsıdegi balany úı janýary óltirgeni jáne onyń alǵan jaraqattan qaıtys bolǵany rastaldy», - dedi qala meri.

Qutqarý qyzmetine shamamen 13:00-de janýardyń shabýyly týraly habarlama kelip túsken. Sábı dereý aýrýhanaǵa jetkizilgenimen, artynsha alǵan jaraqatynan kóz jumǵany anyqtaldy.

Polıtsııa janýardy qasqyr men ıttiń býdany dep sıpattady. Sábıdiń otbasy ony úı janýary retinde ustaǵan. Qala meri oqıǵa kezinde úıde basqa da balalar bolǵanyn aıtty.

Dál osyndaı oqıǵa 2018 jyly Vırdjınııa shtatynda da bolǵan. Ol kezde qasqyr-ıt gıbrıdi segiz kúndik sábıge shabýyl jasaǵan.

Qasqyr-ıt gıbrıdi degenimiz ne jáne olardy AQSh-ta úı janýary retinde ustaý zańdy ma?

Mınnesotadaǵy Wolf Center halyqaralyq ortalyǵynyń málimetine sáıkes, bul – úı ıti men qasqyrdyń býdany.

«Olar jaqsy úı janýary bolýy múmkin be?» degen suraq kóptegen qaıshylyq týdyrdy. Wolfcenter málimetinshe, keıbir adamdar qasqyr men ıt gıbrıdin úı janýary retinde ustaı alady. Biraq janýardaǵy qasqyrdyń belgisi neǵurlym joǵary bolsa, soǵurlym qaýipti.

AQSh-ta jyl saıyn mundaı myńdaǵan janýardy tastap ketedi. Óıtkeni adamdar olardy satyp alady da, kútim jasaýǵa daıyn bolmaı shyǵady. AQSh federaldy zańy qasqyr men ıt býdanyn úı janýaryna jatqyzady, bul atalǵan janýardy ıelenýdi zańdy etedi. Alaıda, basqa shtattardyń mundaı ekzotıkalyq janýardy ósirý men ustaýdy retteıtin óz zańy bar.

Illınoıs, Mıchıgan jáne Nıý-Iork sııaqty birneshe shtattar qasqyr-ıt gıbrıdin úı janýary retinde ustaýǵa zańmen tyıym saldy. Al Alabamada ony asyraý zańsyz emes. Biraq olardy qalaı ustaý kerektigi týraly arnaıy erejeler bar.