AQSh-ta dúnıege kelgen sheteldik balaǵa azamattyq berilmeýi múmkin - CNN

NUR-SULTAN. QazAqparat – Tramp ákimshiligi AQSh-qa baryp bala týǵysy keletin sheteldikterge vıza berý erejesin qatańdatatynyn málimdedi, dep habarlaıdy QazAqparat CNN-ge silteme jasap.

Tramp ákimshiligi AQSh-ta týyp, balaǵa avtomatty túrde amerıkalyq azamattyq alýǵa múmkindik beretin erejeni qaıta qarastyryp jatqanyn málimdedi.

Aq úı ókilderiniń aıtýynsha, kóptegen adam dál osy maqsatta vıza alatyn bolǵan. Tramp mıgratsııalyq zańnamany kúsheıtý týraly burynnan aıtyp keledi, sonymen qatar ol AQSh konstıtýtsııasynyń 14-túzetýi boıynsha Amerıkada týǵan balaǵa azamattyq berý kúlkili ekenin aıtty.

Agenttiktiń habarlaýynsha, AQSh-ta dúnıege kelgen sheteldik balalar týraly resmı statıstıka joq, degenmen, jyl saıyn shamamen 33 myń adam Amerıkaǵa bosaný úshin baratyn kórinedi.

Jańa ereje jaqyn arada jarııalanady. Sheneýnikter bul ulttyq qaýipsizdik úshin jasalyp jatqan shara ekenin málimdedi.