AQSh-ta dybystan jyldam eksperımenttik H-59 ushaǵy tanystyryldy

<p>AQSh-tyń ǵarysh keńistigin zertteý jáne aeronavtıka ulttyq basqarmasy (NASA) men amerıkalyq Lockheed Martin áskerı-óndiristik korporatsııasy dybystan da jyldam H-59 eksperımenttik ushaǵyn tanystyrdy. Kazinform bul týraly TASS-qa silteme jasap habarlaıdy.&nbsp;</p>

Palmdeıldegi (Kalıfornııa shtaty) Lockheed Martin zaýytynda ótken saltanatty is-shara NASA saıtynda translıatsııalandy.

Vedomstvo sózinshe, Quesst baǵdarlamasy aıasynda jasalǵan «tynysh ári dybystan jyldam ushaqtyń» negizgi ereksheligi – ol dybystan jyldam qozǵalatynyna qaramastan ushqanda tars etken daýys shyqpaıdy.

NASA pikirinshe, jańa ushaqty synaqtan ótkizý bolashaqta AQSh-ta jáne basqa elderde 50 jyl buryn engizilgen, áli de qoldanystaǵy kommertsııalyq dybystan joǵary avıatsııanyń qurlyqta ushýyna salynǵan tyıymdy joıýǵa múmkindik beredi.

Ushaqty jasaýshylar H-59 prototıp emes, esperımenttik ushaq ekenin atap ótti. Uzyndyǵy – 30 m jáne qanaty 9 metrge jetetin ushaq saǵatyna 1488 shaqyrym jyldamdyqpen qozaǵala alady. Bul – dybys jyldamdyǵynan joǵary.

«Bar bolǵany birneshe jyl ishinde ıdeıany júzege asyrý qolymyzdan keldi. NASA-nyń H-59 áýe kemesi saıahatymyzdy ózgertip, qashyqtyqty tezirek eńserýge kómektesedi», - dep málim etti ushaq tanystyrylymynda ǵarysh vedomstvosy basshysynyń orynbasary Pamela Melroı.

NASA jaqyn arada júıeni testileýden ótkizip, ushaq qozǵaltqyshtaryn avtonomdy rejımde iske qosýdy josparlap otyr.

2024 jyly H-59 dybys jyldamdyǵynan tómen jyldamdyqpen alǵash synaq retinde ushyrylady dep josparlanǵan.