AQSh-ta bilim alyp jatqan qazaqstandyqtar sany ósti

<p>ASTANA. KAZINFORM &ndash; AQSh Memlekettik departamenti men Halyqaralyq bilim berý ınstıtýty (IIE) 18 qarashada jarııalaǵan baıandamasyna qaraǵanda, 2023-2024 oqý jylynda AQSh-ta joǵary bilim alatyn sheteldik stýdentter sany 1 mln 126 myńnan asyp, 1948 jyldan bergi eń joǵary kórsetkishke jetti, dep habarlaıdy <a href="https://www.chinanews.com.cn/gj/2024/11-19/10321795.shtml" target="_blank" rel="noopener">CNS</a> aqparat agenttigi.</p>

Atalǵan esepke sáıkes, 2023-2024 oqý jylynda AQSh-ta sheteldik stýdentter sany 7%-ǵa artyp, 1 126 690 adamdy qurady. Bul kórsetkish eldegi ýnıversıtetterdegi jalpy stýdentterdiń 5,9%-yn quraıdy.

Stýdentter sany boıynsha birinshi oryndy Úndistan ıelendi, olardyń sany shamamen 332 myńǵa jetip, 23,3%-ǵa ósti jáne jalpy sheteldik stýdentterdiń 29,4%-yn quraıdy. Bul 2009 jyldan beri alǵash ret Úndistan stýdentteriniń sany Qytaıdan asyp otyr. Qytaıdan kelgen stýdentter sany shamamen 277 myńdy qurap, 4,2%-ǵa azaıdy. Úshinshi orynda 43 myń stýdentpen Ońtústik Koreıa tur, bul kórsetkish 1,6%-ǵa tómendegen.

Foto: Foto skrın

AQSh-ta bilim alyp jatqan qazaqstandyq stýdentterdiń sany 2 712-ge jetip, 11.1%-ǵa artqan.

Mamandyqtarǵa qatysty málimetterge sáıkes, sheteldik stýdentterdiń 280 myńǵa jýyǵy matematıka jáne kompıýter salasynda oqıdy. Bul – eń tanymal mamandyqtardyń biri. Injenerııany 210 myń stýdent, al bıznes jáne basqarý mamandyqtaryn 160 myń stýdent tańdaǵan.

Ýnıversıtetter arasynda Nıý-Iork ýnıversıteti kósh bastap tur, onda 27 247 sheteldik stýdent oqıdy. Odan keıin 21 023 stýdentpen Nortıstern ýnıversıteti jáne 20 321 stýdentpen Kolýmbııa ýnıversıteti ornalasqan.

AQSh Saýda mınıstrliginiń málimetinshe, 2023 jyly halyqaralyq stýdentter oqý aqysy men turmys shyǵyndary arqyly AQSh ekonomıkasyna shamamen 50 mıllıard dollar qosqan.

Halyqaralyq bilim berý ınstıtýtynyń prezıdenti Allan Gýdmannyń aıtýynsha, aldaǵy jyldary sheteldik stýdentter sanynyń odan ári ósýi kútilýde.

Ol: «AQSh ýnıversıtetteri sheteldik stýdentterdi kóbirek qabyldaýǵa qabiletti, biz olardy qushaq jaıa qarsy alamyz», – dedi.