AQSh-ta baladaǵy gıperaktıvtilikke em retinde vıdeo oıyn qoldanylady

VAShINGTON. QazAqparat – 2020 jyly EndeavorRx – AQSh-tyń Azyq-túlik jáne dári-dármek basqarmasy (FDA) balalardaǵy nazardyń jetispeýshiligi men gıperaktıvtiliktiń buzylýy aýrýyn emdeýde qoldanýǵa ruqsat bergen alǵashqy kompıýterlik oıyn boldy, dep habarlaıdy QazAqparat BBC News-ke silteme jasap.

EndeavorRx oıynyna AQSh-ta dárigerlerdiń nusqaýlyǵymen ǵana ruqsat beriledi. Onyń bir qaraǵanda basqa oıyndardan aıyrmashylyǵy joq. Zattardy jınap, túrli álem arqyly ǵarysh kemesine júgiretin kishkentaı adamdy basqarasyz. Biraq, qoldanbaǵa negizdelgen oıyn neırobıologtarmen birlesip ázirlengen jáne mıdyń zeıin qyzmetinde negizgi ról atqaratyn aımaqtaryn yntalandyrýǵa jáne jaqsartýǵa arnalǵan.

Dárigerler bul baǵdarlamalyq qosymshany taǵaıyndaǵan soń, balanyń ata-anasyna oıynnyń siltemesi jiberiledi. Bul oıynnyń tıimdi áserine AQSh-tyń Djordjııa shtatyndaǵy Savanna qalasynyń 13 jastaǵy turǵyny Oveın mysal bola alady. Oveınniń zeıini nasharlap, ol oqý úlgerimine áser etken. Taǵaıyndalǵan dári-dármekter balada júrek aıný men bas aýrýyn kúsheıtkendikten toqtatylǵan. Oıyn taǵaıyndalǵannan keıin kóp uzamaı ata-anasy balanyń minez-qulqyndaǵy oń ózgeristerdi baıqaı bastaıdy. Mektepke daıyndyq nátıjeli bolyp, muǵalimder tarapynan keletin jaǵymsyz habarlamalar azaıǵan.

Endeavor ázirleýshisi – Bostondaǵy Akili tehnıkalyq fırmasy, ol aldaǵy ýaqytta oıyndy Eýropaǵa shyǵarýdy josparlap otyr.

Foto: bbc.com