AQSh-ta aralyq saılaýdyń alǵashqy qorytyndysy shyqty

ASTANA. QazAqparat – AQSh-tyń birneshe shtatynda aralyq saılaýda daýys berý aıaqtaldy, onyń barysynda amerıkalyqtar Ókilder palatasyn, Senattyń úshten birin, kóptegen shtattardyń zań shyǵarýshy organdary men gýbernatorlaryn tolyǵymen qaıta saılaıdy. Alǵashqy nátıje shyqty, biraq bul saılaýda sheshýshi rólge ıe bolýy múmkin negizgi shtattardyń taǵdyry áli anyq emes. Bul týraly QazAqparat VVS aqparat agenttigine silteme jasap habarlaıdy.

CBS telekompanııasynyń boljamynsha, saılaý nátıjesinde Ókilder palatasynda baqylaý respýblıkashyldarǵa ótýi múmkin. Qazirgi ýaqytta Kongresstiń eki palatasyn da prezıdent Djo Baıdenniń demokrattary basymdyqqa ıe.

Qazir parlamentte demokrattar 220, al respýblıkashyldar 212 oryndy alyp otyr.

Kópshilikke qol jetkizý úshin partııa 218 orynǵa ıe bolýy tıis. ıAǵnı, respýblıkashyldar jeńisti óz qolyna alý úshin bul saılaýda nebári alty orynǵa artyq alýy kerek.

Senatqa keletin bolsaq, aldyn ala júrgizilgen saýalnamalar demokrattar men respýblıkashylar shamamen teń kele jatqanyn kórsetedi.

Saılaý túnindegi birinshi mańyzdy nátıje – Florıda gýbernatory Ron Desantıstiń jańa merzimge saılanýy (ol shtatty 2019 jyldan beri basqarady).

CBS Desantıs jeńiske jetedi, respýblıkashyl senator Marko Rýbıo da óz mandatyn saqtap qalady dep boljap otyr.

Agenttiktiń Arızonadaǵy tilshisi Sofı Longtyń aıtýynsha, bul AQSh-tyń saıası kartasyndaǵy eń mańyzdy shtattardyń biri jáne onda búkil elde bolyp jatqan protsesterdi shaǵyn úlgide kórýge bolady.

Mundaǵy ınflıatsııa ortasha amerıkandyq deńgeıden joǵary, basqa shtattarǵa qaraǵanda áldeqaıda ótkir, kóshi-qon jáne qaýipsizdik problemasy bar (Arızona Meksıkamen shekaralas).

Sonymen qatar, bul jerde jahandyq jylyný saldary qatty sezilýde, ol qurǵaqshylyq pen órtten zardap shegip otyr.

Arızona dástúrli túrde respýblıkalyq shtat boldy, biraq 2020 jyly Djo Baıden munda tym shamaly (jarty paıyzdyq pýnktten az) basymdyqpen jeńdi.

Burynǵy prezıdent Tramp jergilikti saılaý sheneýnikterin daýys berýden bas tartýǵa kóndirýge tyrysty.

Pensılvanııa – demokrattar úshin de, respýblıkashyldarǵa da daýys bere alatyn taǵy bir «qubylmaly shtat».

Bul jerde Barak Obama eki ret jeńiske jetken, biraq 2016 jyly saılaýshylar Hılları Klıntondy emes, Trampty qoldady.

2020 jyly olar Djo Baıdenge daýys berý arqyly demokrattardy taǵy da qoldady.

Pensılvanııa gýbernatory qyzmeti úshin tartys jolyna otstavkadaǵy polkovnık, hrıstıandyq fýndamentalızm qoldaýshysy senator Dag Mastrıano tústi.

Ol eger gýbernator bolyp saılansa, óz shtatynda prezıdent saılaýyn kýálandyrý protsesin qadaǵalaıtynyn aıtty.

Kongrestiń joǵarǵy palatasyna tanymal telejúrgizýshi, burynǵy dáriger Mehmet Oz jáne demokrat Djon Fetterman úmitker.

Pensılvanııadaǵy saılaý nátıjeleri birneshe kúnnen soń belgili bolýy múmkin. Bul daýys sanaýdyń jergilikti júıesine baılanysty.

Daýys sanaýdyń alǵashqy qorytyndylaryna qaraǵanda, ázirge Oz ben Fetterman shamamen birdeı daýys jınap jatyr.

Bul saılaýdyń nátıjesi Djo Baıdenniń aldaǵy eki jyldaǵy prezıdenttigine jáne onyń saıasatyna, sonyń ishinde Reseıdiń Ýkraınadaǵy agressııasyna qarsy turýǵa qatty áser etetini sózsiz.

Ókilder palatasynyń barlyq 435 múshesi eki jyl saıyn qaıta saılanady. Sońǵy eki jylda demokrattar palatada basymdyqqa ıe boldy.

Bul ádettegi jaǵdaı: jańa prezıdent saılanǵan kezde onyń partııasy Kongresstiń eki palatasyn da baqylaýǵa alady.

Foto: gettyimages.com