AQSh-ta afroamerıkalyq azamat polıtseılerdiń qolynan kóz jumǵannan keıin jappaı tártipsizdik boldy

NUR-SULTAN. QazAqparat – Mınneapolıs qalasynda qarýsyz afroamerıkalyq azamat polıtseılerdiń qolynan qaza tapqannan keıin AQSh qalalarynda qarsylyq sharasyna qatysýshylar polıtseılermen qaqtyǵysty, dep habarlaıdy QazAqparat VVS-ge silteme jasap.

Resmı aqparatqa qaraǵanda, Mınneapolıstiń eks-polıtseıi Derek Shovın qamaýǵa alyndy. Ol tizesin Floıd myrzanyń moınyna segiz mınýt 46 sekýnd boıy qoıyp, ony tunshyqtyrǵan. Floıdty jedel járdem kóligimen Hennepın aımaqtyq medıtsına ortalyǵyna jetkizip, bir saǵattan keıin onyń qaıtys bolǵany habarlanǵan.

Shovın úshinshi dárejeli ólimge aıyptalyp otyr (kúsh qoldanyp, abaısyzda óltirý). Mınnesot shtatynyń zańy boıynsha mundaı qylmys jasaǵan adam 25 jylǵa deıin bas bostandyǵynan aıyrylady. Taǵy da úsh polıtseıge qatysty tergeý jalǵasyp jatyr.

Biraq bul qarsylyq sharalaryn toqtata almady. Júzdegen adam Vashıngtondaǵy Aq úıdiń aldyna jınalyp, ádildikti talap etti. Olar Floıd myrzanyń sýretin kórsetip, «Men tynys ala almaımyn» dep qaıtalaı berdi. Bul Floıdtyń sońǵy sózi edi.

Qarsylyq sharalary kóp shtatta jalǵasty. Los-Andjeles, Chıkago, Denver, Hıýston, Lýısvıll, Fenıks, Kolýmbýs pen Memfıste demonstranttar men polıtseıler arasynda qaqtyǵys boldy.

Atlantada qarsylyq tanytýshylar ǵımarattardy qıratyp, Sı-en-en telekompanııasynyń shtab-páterine jaqyn jerdegi polıtsııa kólikterin órtedi.

Prezıdent Donald Tramp bul oqıǵany «óte sumdyq nárse» dep baǵalap, osylaı jalǵasa berse Mınneapolıske arnaıy ásker jiberýi múmkin ekenin aıtty.