AQSh-ta 18 adamdy atyp óltirgen er adamnyń denesi tabyldy

<p>AQSh-tyń Men shtatyndaǵy Lıýıston qalasynda 18 adamdy óltirdi degen kúdikke ilingen er adam úsh kún izdeýden keıin óli tabyldy. Kazinform agenttigi bul týraly <a href="https://www.bbc.com/russian/articles/cd1j9v908ejo" target="_blank" rel="noopener">VVS</a> aqparat agenttigine silteme jasap habarlaıdy.</p>

«Sársenbige qaraǵan túni bolǵan atysqa kúdikti adam tabyldy, ol qaıtys bolǵan», - delingen Androskoggın okrýginiń sherıf keńsesiniń baspasóz habarlamasynda.

CBS News arnasynyń habarlaýynsha, 40 jastaǵy Robert Kardtyń denesi qoqys óńdeý ortalyǵynyń janynan tabylǵan. AR-diń polıtsııadaǵy derekkózderi onyń óz-ózine qol jumsaǵan bolýy múmkin ekenin aıtty.

Olar, sonymen qatar, kúdiktimen baılanysty úıden sýıtsıd týraly jazylǵan jazba tabylǵanyn aıtty. Ol Kardtyń ulyna arnaldy. Úıden kúdiktiniń uıaly telefony da tabyldy.

Lıýıston merııasynda ótken baspasóz máslıhatynda Men shtatynyń gýbernatory Djanet Mılls er adamnyń denesi Lısbonda, atys ornynan alys emes jerden tabylǵanyn aıtty.

«Búgin men Robert Kardtyń eshkimge qaýip tóndirmeıtinin bilip, jeńil dem aldym», - dedi ol.

Lıýıston polıtsııasynyń basshysy Devıd Sent Per quqyq qorǵaý organdarynyń jumysy aıaqtalmaǵanyn aıtty.

Polıtsııanyń aıtýynsha, bılik aldymen qaza bolǵandardyń otbasymen sóıleskisi keletindikten, kóptegen málimetter ázirge jasyryn qalyp otyr.

Buǵan deıin AQSh-tyń Men shtatyndaǵy Lıýıston qalasynda belgisiz bireý adamdarǵa oq jaýdyrǵany týraly habarlaǵan bolatynbyz.