AQSh sarapshysy: Astanadaǵy úılerdiń dızaınyna mamandardy tartý kerek

ASTANA. QazAqparat – AQSh-tan kelgen meıman, Steppe Global Education bilim berý ortalyǵynyń basshysy Djoel Erıkson baýyrlas qalalar forýmynda Astanaǵa qatysty pikir aıtty, dep habarlaıdy QazAqparat tilshisi.

Onyń paıymynsha, elordadaǵy úıler bir-birine uqsatyp salynǵan. Bul rette turǵyn úı keshenderiniń dızaınyna mamandardy tartý kerek dep esepteıdi.

«Osyndaǵy páterler de birdeı kórindi. Týrıster úshin bul kórinis azdap qyzyqsyz bolady. Shynyn aıtsam, AQSh-ta da osyndaı másele bar. Bizde de jańa úıler tapsyrylyp jatyr jáne olar ózara uqsas. Bul turǵyda ózgeshe kózqaras kerek, ıaǵnı dızaın salasynda mamandardy jumyldyrǵan jón bolar», - dedi Djoel Erıkson.

Sonymen qatar ol Astanada dámhanalar kóp ekenin, aǵash otyrǵyzylǵan aýdandar kóbeıgenin aıtty.

«Men bilim berý salasynda jumys istep júrmin. Sondyqtan Qazaqstan astanasyndaǵy ýnıversıtet qalashyqtaryn aralap shyqpaqpyn», - dedi meıman.

Sondaı-aq Djoel Erıkson Qazaqstanda «ıAndekstiń» óz platformasyn damytý týraly oıymen bólisti.

Aıta keteıik, búgin Prezıdent Qasym-Jomart Toqaev elordanyń 25 jyldyq mereıtoıyna oraı uıymdastyrylǵan Astananyń baýyrlas qalalary forýmyna qatysty. Іs-sharaǵa AQSh, Ulybrıtanııa, Germanııa, Italııa, Izraıl, Túrkııa, Polsha, Úndistan Reseı, Qyrǵyzstan, Ózbekstan, Japonııa, Ázerbaıjan, Ońtústik Koreıa elderinen mamandar keldi.