AQSh prezıdenti Djo Baıdenniń deni saý jáne óz mindetterin tolyq oryndaı alady – Aq úı dárigeri

ASTANA. QazAqparat – AQSh prezıdenti Djo Baıdenniń densaýlyq jaǵdaıy jaqsy jáne óz mindetterin júıeli oryndaý úshin barlyq kúsh-jigeri jetkilikti. Bul týraly QazAqparat tilshisi BBC News-ke silteme jasap habarlaıdy.

Beısenbi kúni dárigerler Vashıngton aýrýhanasynda AQSh-tyń 80 jastaǵy basshysyn tolyq medıtsınalyq tekseristen ótkizdi. Bul - Djo Baıdenniń prezıdenttik qyzmetke kiriskennen bergi ekinshi tekserisi.

Medıtsınalyq tekseris AQSh prezıdentiniń burynǵy aýrýlaryn anyqtaý men qazirgi densaýlyq jaǵdaıyn baqylaý maqsatynda júrgizilgen.

«Óziniń tolyq qyzmettik mindetterin oryndaýǵa prezıdenttiń kúsh-jigeri jetkilikti», - dep jazdy Aq úı dárigeri Kevın O'Konnor óziniń qyzmettik jazbasynda.

Qujatqa sáıkes, Djo Baıden qazirgi ýaqytta júrektiń turaqsyz soǵýy, joǵary holesterın, epızodtyq qyshqyl reflıýksi, maýsymdyq allergııa, omyrtqa artrıti jáne aıaq býyndaryndaǵy nervtik júıelerdiń zaqymdanýy dertteri boıynsha em qabyldap jatyr. Degenmen onyń jaǵdaıy turaqty.

Medıtsınalyq tekserý kezinde Djo Baıdenniń ınsýlt nemese Parkınson sııaqty nevrologııalyq aýrýlarmen aýyratynyn anyqtaý maqsatynda kúrdeli zertteý júrgizilgen. Nátıjesinde dárigerler AQSh prezıdentiniń atalǵan derttermen aýyrmaıtynyn rastady.

Sońǵy saılaý kezinde Djo Baıden saıası qarsylastarynyń aqyl-oı kemshilikteri aýrýymen syrqattanady degen málimdemelerin joqqa shyǵaryp, kognıtıvti testten bas tartqan bolatyn.

Foto: GETTY IMAGES