AQSh prezıdenti Djo Baıdenge ımpıchment jarııalanýy múmkin
Ókilder palatasynyń spıkeri Kevın Makkartı tergeý «bıligin asyra paıdalaný, ádildikke kedergi keltirý jáne jemqorlyq» syndy aıyptaýlardy negizge alatynyn málimdedi.
Respýblıkashylar qańtarda Ókilder palatasynda basymdyqqa ıe bolǵannan bastap-aq qazirgi prezıdentke qatysty tergeý júrgizip jatyr.
Buǵan deıingi tyńdalymdar Baıdenniń quqyqqa qarsy isine naqty dálel tappady. Degenmen, osy otyrystar barysynda prezıdenttiń uly Hanter Baıdenniń iskerlik baılanystaryna (respýblıkashylardyń pikirinshe, «kúmán týdyratyn baılanystar») qatysty birqatar másele ashyldy, sondaı-aq ulynyń osy is-árekentteri jaıynda Djo Baıdenniń habardar ekeni anyqtaldy.
Makkartı prezıdenttiń quqyqqa qaıshy áreketterin tergep jatqan resmı tulǵalar Baıdenniń otbasyna erekshe nazar aýdarǵanyn málimdedi.
Aq úı Makkartı sheshimin birden synǵa aldy:
«Ókilder palatasyndaǵy respýblıkashylar prezıdentke qatysty toǵyz aıdan beri tergeý júrgizip jatyr, biraq quqyq buzýǵa qatysty eshqandaı dálel tappady», - dep jazdy Aq úı ókili ıAn Sems áleýmettik jelide.
«Ekstremal saıasattyń eń nashar kórinisi», - dep sıpattady ol osy jaǵdaıdy.
Qazirgi ýaqytta Hanter Baıdenge qatysty sheteldegi iskerlik múddesine baılanysty salyqtan jaltarý qylmystary jóninde federaldyq tergeý júrip jatyr.
Aq úı Hanter Baıden isine óziniń qatysyn joqqa shyǵaryp otyr jáne ulynyń bıznesine prezıdenttiń esh qatysy joq ekenin málimdedi.
AQSh Konstıtýtsııasy boıynsha, prezıdent «opasyzdyq, jemqorlyq pen basqa da aýyr qylmys pen isteri» úshin jaýapqa tartylyp, qyzmetinen ketýi múmkin.
Degenmen, prezıdent Baıdendi ornynan alyp tastaý jónindegi amaldyń bári sátsiz bolady, dep jazady BBC News. Respýblıkashylardyń baqylaýyndaǵy Ókilder palatasy Baıdendi ornynan taıdyrý qajet dep daýys bergenniń ózinde, Senat ony maquldamaýy múmkin, sebebi ol jaqta demokrattar basym daýysqa ıe.
Tramp - eki ret ımpıchment jarııalanyp, ekeýinde de respýblıkashyl-áriptesteri aqtap alǵan AQSh-tyń jalǵyz prezıdenti.