AQSh pen onyń odaqtastary Izraıl men «Hezbolla» arasyndaǵy atysty 21 kúnge toqtatýǵa shaqyrdy

<p>ASTANA. KAZINFORM &ndash; AQSh, Frantsııa jáne olardyń keıbir odaqtastary Izraıl men &laquo;Hezbolla&raquo; arasyndaǵy atysty 21 kúnge dereý toqtatýǵa shaqyrdy. Sonymen qatar Gazadaǵy bitimge qoldaý bildirdi. Bul týraly sársenbi kúni BUU Qaýipsizdik keńesiniń Lıvan máselesi boıynsha shuǵyl otyrysynan keıin Aqúı taratqan birlesken <a href="https://www.whitehouse.gov/briefing-room/statements-releases/2024/09/25/joint-statement-by-the-united-states-australia-canada-european-union-france-germany-italy-japan-saudi-arabia-united-arab-emirates-qatar/" target="_blank" rel="noopener">málimdemede </a>aıtyldy.</p>

Ótinishke AQSh, Aýstralııa, Kanada, Eýropalyq odaq, Frantsııa, Germanııa, Italııa, Japonııa, Saýd Arabııasy, Birikken Arab Ámirlikteri, Ulybrıtanııa jáne Qatar qol qoıdy. Olar Izraıl men Lıvan úkimetterin atysty ýaqytsha toqtatýǵa dereý kelisýge shaqyrdy.

- 2023 jyldyń 8 qazanynan beri Lıvan men Izraıl arasyndaǵy jaǵdaı adam tózgisiz jáne aımaqtyq shıelenis qaýpin tóndiredi. Bul Izraıl halqynyń da, Lıvan halqynyń da múddesine sáıkes kelmeıdi... Biz barlyq taraptardy, sonyń ishinde Izraıl men Lıvan úkimetterin osy kezeńdegi BUU Qaýipsizdik Keńesiniń 1701 qararyna sáıkes ýaqytsha atysty toqtatýdy dereý maquldaýǵa jáne dıplomatııalyq retteýge naqty múmkindik berýge shaqyramyz, - delingen birlesken málimdemede.

- Biz bul talqylaýlardy biraz ýaqyttan beri júrgizip kelemiz, - dedi Reuters agenttigine joǵary laýazymdy amerıkalyq sheneýnik.

Aıtýynsha, Vashıngton men onyń odaqtastary osy 21 kúndik úzilis kezinde bul kelissózderdi budan keńirek kelisimge aınaldyrýǵa nıetti.

Izraıldiń BUU-daǵy ókili shaqyrýdy quptap, Izraıldiń dıplomatııalyq sheshimdi qalaıtynyn aıtty. Eger kelisim ızraıldikterdiń úılerine aman-esen oralýyna múmkindik bermese, Izraıl kúsh qoldanýdan tartynbaıtynyn eskertti, dep jazady The Times of Israel.

Basylymnyń habarlaýynsha, Izraıl men Lıvan aldaǵy saǵattarda jaýap berýi tıis, al Iran «Hezbollaǵa» tolyq qoldaý kórsetýge ýáde berdi.

Izraıl men Irannyń qoldaýyndaǵy «Hezbolla» arasyndaǵy shaıqas sońǵy aptada kúrt shıelenisip, jappaı soǵystyń az-aq aldynda tur, bul qaqtyǵys búkil Taıaý Shyǵysqa taralýy múmkin degen alańdaýshylyq týǵyzdy.