AQSh pen Qazaqstan arasyndaǵy saýda-sattyq kólemi artatyndyǵyna senemin - Djord Krol

ASTANA. QazAqparat - Sanktsııalar Qazaqstanǵa nemese qazaqstandyq tulǵalarǵa qarsy baǵyttalmaǵan. Bul týraly búgin Amerıka saýda palatasy uıymdastyrǵan forým aıasynda BAQ ókilderine suhbat bergen   AQSh-tyń Qazaqstandaǵy Tótenshe jáne ókiletti elshisi Djord Krol aıtty, dep habarlaıdy QazAQparat.

«Vashıngtonda amerıkalyq jáne qazaqstandyq sarapshylar arasynda turaqty konsýltatsııalar, baılanystar bar. Bul rette atalǵan sanktsııalardyń qalaı jumys isteıtindigin túsingen mańyzdy. Sanktsııalar Qazaqstanǵa nemese qazaqstandyq tulǵalarǵa qarsy baǵyttalmaǵan. Bul atalǵan sanktsııanyń maqsaty emes. Sanktsııa Reseıge, tek Reseıge ǵana qatysty», - dep basa aıtty ol.

Osy rette Elshi bul sanktsııalardyń alynyp, AQSh pen Reseı jáne ózge elder arasyndaǵy saýda-sattyq baılanystary durys jolǵa túsetindigine senim artatyndyǵyn basa aıtty.

«Qazirgi ýaqytta Qazaqstanda eshqandaı problema kórip otyrǵanym joq. Biz seriktespiz, ekonomıkalyq seriktespiz. Bul ásirese Prezıdent Nursultan Nazarbaevtyń (AQSh-qa)  sapary barysynda anyq baıqaldy. Ózderińizde bilesizder, bizdiń eldiń Prezıdenti de bıznesmen. Bizde óte tyǵyz konsýltatsııalar bar.  AQSh Elshisi retinde bul jerdegi jumysymnyń kestesi ár ýaqytta tyǵyz. Ásirese, joǵaryda aıtqan sapardan keıin jumys arta tústi. Buǵan qýanyshtymyn», - dedi Djordj Krol.

Sonymen qatar, ol Qazaqstan men Amerıka arasynda taýar aınalymynyń arta túserine úmit artatyndyǵyn basa aıtty.

«Taıaý ýaqytta taýar aınalymynyń artatyndyǵyna úmit artamyn. Qazir AQSh úshin eksporttaǵy eń mańyzdy baǵyt et bolyp otyr. Reformalar júrgizilgennen keıin Qazaqstanǵa ınvestıtsııa kólemi artyp, elderimiz arasynda saýda-sattyq jandanady dep oılaımyn», - dedi AQSh Elshisi.