AQSh pen Kanadada osy demalysta 50 gradýsqa deıin aıaz bolady

ASTANA. QazAqparat – Kanada men AQSh-ta 100 mıllıonǵa jýyq turǵyn osy demalys kúnderi qatty aıazǵa tap bolady. Soltústik Amerıka kontınentiniń keı aýdandaryna Arktıkadan sýyq jel keledi, keı jerde aýa temperatýrasy -50°S sııaqty seziledi, dep eskertedi meteorologtar, dep habarlaıdy QazAqparat BBC-ge silteme jasap.

Olar mundaı aýa raıynda 10 mınýtqa jeter-jetpes ýaqytta úsip qalý múmkin ekenin eskertip, Ortalyq Kanada men Amerıkanyń soltústik-shyǵysyndaǵy kóptegen shtattardyń turǵyndaryna úıde otyrýǵa keńes berdi.

Dúısenbiden beri AQSh-ta qolaısyz aýa raıynan kem degende 11 adam qaıtys boldy.

Atap aıtqanda, apta basynda muzdy daýyl saldarynan Tehasta segiz adam, Oklahomada ekeýi jáne Arkanzasta bireýi qaza tapty.

Osy aptanyń kúrt salqyndaýy Kanadanyń shyǵysyndaǵy teńiz provıntsııalarynan AQSh-tyń ortalyǵyna deıin sozylǵan qýatty arktıkalyq fronttarǵa baılanysty.

Jalpy sany 82 mıllıon adam turatyn birneshe shtatta temperatýra -17°C gradýstan tómen túsedi.

Atap aıtqanda, Nıý-Gempshır shtatyndaǵy Vashıngton taýynyń basynda aýa temperatýrasy -79°C gradýs sekildi sezilip, jeldiń jyldamdyǵy 160 km/saǵ jetýi yqtımal.

«Bul joly shynymen de qatty sýyq bolady dep tolyq senimmen aıtyp otyrmyz. Búgin munda temperatýra -15°C, biraq aıaz tez kúsheıedi», - dedi jergilikti meteorolog Fransıs Tarasevıch Reuters agenttigine.

Meın shtatynyń keı aýdandaryna 1971 jyldan bergi eń sýyq aýa raıy kelýi kerek. Mysaly, Portlend qalasynda jeldiń áserinen temperatýra -40°C gradýs sııaqty seziledi.

Kórshiles Vermont shtatynyń Berlıngton qalasynda termometr baǵanasy -20°deıin tómendeıdi.

Bostonda da aıazdy jel, qazirgi ýaqytta qala qyzmetteri tótenshe jaǵdaı rejıminde jumys istep tur. Atap aıtqanda, qalada memlekettik mektepter jabylyp, jergilikti bılik adamdar jylynýǵa keletin arnaıy ortalyqtar ashty.

Nıý-Iorkte temperatýra senbige qaraı -17°C deıin tómendeýi múmkin, degenmen meteorologtar termometr baǵanasy demalys kúnderiniń sońyna qaraı qaıtadan kóteriletinine sendiredi.

Kanadanyń birneshe aımaǵynda temperatýra -38 gradýs aıazdan -50 gradýsqa deıin tómendeýi múmkin.

Eldiń ulttyq aýa raıy qyzmeti juma kúni tańerteń teńiz shtattaryna, Kvebektiń kóp bóligine, búkil Ontarıoǵa jáne ishinara Manıtoba shtatyna qatty sýyq keletinin eskertti.

Kanada astanasy Ottavada aıazdyń saldarynan shańǵy men konkı tebý joldary jabyldy. Torontoda juma kúni temperatýra -29°deıin tómendedi.

Aptanyń basynda muzdy daýyl soǵyp, joldar muz aıdynyna aınalǵan Tehasta juma kúni aýa raıy jylynyp, muz erýi kerek.

Buǵan deıin shtattyń qutqarý qyzmeti dúısenbiden beri tirkelgen júzdegen apat jaıynda habarlady, birneshe kisi kóz jumǵan.

Juma kúni Tehas, Arkanzas jáne Mıssısıpıdiń 309 myńnan astam turǵyny elektr qýatynsyz qaldy.

Foto: Reuters