AQSh pen Eýropada qor bırjasynyń ındeksteri kúrt tómendedi

NUR-SULTAN. QazAqparat – Eýropanyń qor naryǵynda baǵa belgileri tómendedi. Batys Eýropanyń STOXX Europe 600 kompanııalar ındeksi - 4 paıyzdan asa, nemistiń DAX-y – 2,8 paıyzǵa, frantsııalyq CAC-40 - 4,6 paıyzǵa, brıtandyq FTSE – 4 paıyzǵa quldılady. Bul jóninde Euronews.com agenttigine silteme jasap QazAqparat habarlaıdy.

Nıý-Iork qor bırjasynyń basty ındeksteri naryq qatysýshylarynyń koronavırýstyń ekinshi tolqynynan qorqýy sebebimen kúrt tómendegen. Dow Jones ónerkásip ındeksi 7 paıyzdan astam joǵaltqan – bul ol úshin sońǵy úsh aıdaǵy eń nashar kún. Quramyna eń iri 500 kompanııalar kiretin S&P 500 ındeksi 6 paıyzdaı tómendegen. Nasdaq elektrondy bırjasynyń ındeksi 2 paıyzdan astam tómendedi.

Eń qatty tómendegen - áýe jelileri, krýız operatorlary men týroperatorlar, sondaı-aq energetıkalyq sektordyń baǵa belgileri.

Naryq analıtıkteri ınvestorlardyń kóńil-kúıine Florıda, Tehas jáne Kalıfornııa shtattarynda koronavırýs juqtyrý faktileriniń kóbeıgeni týraly málimetter áser etkenin aıtyp otyr.

Taıaýda AQSh-tyń Federaldyq qor júıesi ekonomıkany qalpyna keltirý uzaq ýaqytqa sozylatynyn jáne indettiń ekinshi tolqyny bastalsa, karantındi qaıta engizýge bolmaıtynyn málimdedi. Ótken aptada saýda bırjasyna jumyssyzdyq boıynsha járdemaqyny 1,5 mln adam surap keldi.

FQJ boljamynsha, AQSh-tyń jalpy ishki ónimi bıyl 6,5 paıyzǵa tómendep, jumyssyzdyq deńgeıi 9.3 paıyzdy quraıdy. Qazirgi kezde kórsetkish – 13.3 paıyz.