AQSh muhıttyń ústinde ushyp júrgen Qytaı aerostatyn atyp túsirdi

ASTANA. QazAqparat - Ońtústik Karolına jaǵalaýynda Atlant muhıtynyń ústinen ushyp bara jatqan Qytaı aerostaty atyp túsirildi. Qazir sýǵa túsken qaldyqtardy tazartý operatsııasy júrip jatyr. AQSh prezıdenti Djo Baıden ushqyshtardy tapsyrmanyń sátti oryndalýymen quttyqtady, dep habarlaıdy QazAqparat Euronews-ke silteme jasap.

Buǵan deıin AQSh aspanynda jumbaq shar paıda bolyp, ony Pentagon tyńshylyq jasap júrgen Qytaıdyń obektisi dep málimdegen.

Osyǵan baılanysty AQSh memlekettik hatshysy Entonı Blınken Qytaıǵa saparynan bas tartqan bolatyn.

Beıjiń munyń qate ekenin aıtyp, asyǵys sheshim qabyldamaýǵa shaqyrdy.

«Qytaıdyń Amerıka Qurama Shtattarynyń ústinen barlaý aerostatyn ushyrý sheshimi aqylǵa syımaıdy, bul - jaýapsyzdyq. Másele osynda. Bul - bizdiń egemendigimizdi buzý. Bul - halyqaralyq quqyqty buzý. Josparlanǵan sapar aldyndaǵy mundaı qadam biz talqylaımyz dep otyrǵan taqyryptarǵa, kelissózge zııanyn tıgizedi», - deıdi AQSh memlekettik hatshysy.

Entonı Blınken AQSh-tyń Qytaımen dıplomatııalyq baılanysqa múddeli ekenin jáne múmkindik bolǵan kezde Beıjińge barýdy josparlap otyrǵanyn aıtty.

Sonymen qatar, AQSh Qytaımen baılanys arnalaryn únemi ashyq ustaıdy.

Buǵan deıin senbi kúni Qytaı bıligi áýe sharynyń AQSh áýe keńistigine kezdeısoq ótip ketýine baılanysty AQSh-tyń shabýyldary men japqan jalasyna tózbeıtinin málimdedi.