AQSh memlekettik hatshysy Entonı Blınken Qazaqstannan keıin Ózbekstan men Úndistanǵa barady
28 aqpanda Memlekettik hatshy Astanaǵa kelip, ekijaqty yntymaqtastyqty damytý úshin Qazaqstannyń resmı tulǵalarymen kezdesedi.
Sodan keıin ol AQSh-tyń Ortalyq Azııa elderiniń táýelsizdigi, egemendigi men aýmaqtyq tutastyǵyna jáne jalpy jahandyq máselelerdi sheshýde óńirmen yntymaqtastyqqa beıildiligin rastaý úshin Ortalyq Azııanyń bes memleketi ókilderimen C5+1 formatynda mınıstrlik kezdesýine qatysady.
C5+1 mınıstrlik kezdesýi ekonomıkalyq, energetıkalyq jáne ekologııalyq yntymaqtastyqty, sondaı-aq Amerıka Qurama Shtattary, Qazaqstan Respýblıkasy, Qyrǵyz Respýblıkasy, Tájikstan Respýblıkasy, Túrikmenstan jáne Ózbekstan Respýblıkasy arasyndaǵy qaýipsizdik salasyndaǵy yntymaqtastyqty nyǵaıtýǵa baǵyttalmaq.
Memlekettik hatshy C5+1 mınıstrlik kezdesýi aıasynda ekijaqty jáne kópjaqty yntymaqtastyq múmkindikterin talqylaý men gúldengen, qaýipsiz ári demokratııalyq aımaqty qurýdyń ortaq maqsatyn ilgeriletý úshin Qyrǵyzstan, Tájikstan jáne Túrikmenstannyń joǵary laýazymdy memlekettik sheneýnikterimen bólek jolyǵady.
Qazaqstannan keıin E. Blınken Tashkentke barady, onda ol birqatar ekijaqty jáne aımaqtyq deńgeıdegi áriptestikti odan ári jyljytý máseleleri boıynsha Ózbekstannyń resmı tulǵalarymen birqatar kezdesýler ótkizedi.
1 naýryz kúni Memlekettik hatshy G20 elderiniń syrtqy ister mınıstrleriniń kezdesýine qatysý úshin Nıý-Delıge attanady. Ol jıyn azyq-túlik jáne energetıkalyq qaýipsizdik, turaqty damý, esirtkige qarsy kúres, jahandyq densaýlyq saqtaý, gýmanıtarlyq kómek jáne tabıǵı apattardyń saldaryn joıý, sonymen qatar genderlik teńdik, áıelderdiń quqyǵy men múmkindikterin keńeıtý salalarynda kópjaqty yntymaqtastyqty nyǵaıtý máselelerine arnalmaq.
Buǵan deıin AQSh Memlekettik hatshysy Entonı Blınken Qazaqstanǵa alǵash ret keletinin habarlaǵan edik.