AQSh kompanııalary Qazaqstandaǵy IT salaǵa ınvestıtsııa salmaq

ASTANA. QazAqparat - Ulttyq ekonomıka mınıstri Álibek Qýantyrov AQSh kompanııalarynyń elimizdiń naryǵyna kirý múmkindigi jaıynda pikir bildirdi, dep habarlaıdy QazAqparat tilshisi.

«Jaqynda AQSh Saýda palatasy Qazaqstannyń Saýda jáne ıntegratsııa mınıstrligimen birlesip uıymdastyrýymen bıznes-forým ótip, oǵan AQSh kompanııalary qatysty. Olar shynymen de Qazaqstan aýmaǵynda bıznesin damytýǵa múddeli. Sondyqtan kásipkerler forýmǵa arnaıy kelip, elimizdiń túrli saladaǵy áleýetimen tanysty. Olar salalyq mınıstrlikterde tıisti kezdesýler ótkizip jatyr, sondaı-aq bizdiń naryqty zertteýge kiristi», - dedi Álibek Qýantyrov Astana halyqaralyq forýmy aıasynda ótken brıfıngide.

Onyń aıtýynsha, AQSh kompanııalary elimizdegi túrli saladaǵy múmkindikterdi qarastyryp jatyr.

«Qazir olar munaı-gaz sektoryna ınvestıtsııa salatyn iri kompanııalarmen ǵana shektelmeıdi. Atap aıtqanda, AQSh kompanııalary óndiristi, mashına jasaýdy, IT-ındýstrııany, ınfraqurylymdy damytý baǵytyna ınvestıtsııa salmaq. Olar elimizde IT salasynyń qarqyndy damyp kele jatqanyn kórip otyr. Meniń oıymsha, biz olarmen óte tyǵyz qarym-qatynasta jumys isteı alamyz. Qazirdiń ózinde AQSh ónimderi bizdiń elde belsendi túrde paılanylyp jatyr. Biz Google ókilderimen kezdestik, olarmen naqty máselelerdi talqyladyq», - dedi mınıstr.

Budan buryn habarlanǵandaı, búgingi forýmda Ulttyq ekonomıka mınıstri Álibek Qýantyrov perspektıvasy tómen aýyldardyń turǵyndaryn damý múmkindigi joǵary eldi mekenderge kóshirý múmkindigine qatysty pikir bildirdi.

Senat Tóraǵasy Máýlen Áshimbaev Astana halyqaralyq forýmy alańynda sóz sóılep, álemdik tártiptiń paradıgmasy ózgergen kezeńdegi «orta» memleketterdiń róli jóninde baıandama jasady.