AQSh Qazaqstanmen ekonomıkalyq baılanysyn tereńdetip, ınvestıtsııany ulǵaıtýy kerek - Denıel Rýnde

VAShINGTON. QazAqparat - AQSh Qazaqstanmen saýda-ekonomıkalyq baılanysyn tereńdetip, ınvestıtsııa kólemin ulǵaıtýy kerek. Bul týraly Qazaqstan Prezıdenti Nursultan Nazarbaevtyń Vashıngtonǵa resmı saparyna oraı pikir bildirgen Strategııalyq jáne halyqaralyq zertteýler ortalyǵynyń jobalar jónindegi dırektory Denıel Rýnde aıtty, dep habarlaıdy QazAqparat.

«AQSh Qazaqstanmen saýda-ekonomıkalyq baılanysyn tereńdetip, ınvestıtsııa kólemin ulǵaıtýy kerek dep esepteımin. Munyń Qazaq bıliginiń de mańyz berip otyrǵan basymdyǵy ekeni belgili. Aıta keterligi, Qazaqstanda bilimdi qoǵam qalyptasqan. Tipti, álemdegi eń bilimdi, densaýlyǵy myqty, baı elderdiń qatarynda dep aıtar edim», - dedi ol qazaqstandyq BAQ ókilderine bergen suhbatynda.

Amerıkalyq sarapshynyń paıymynsha, Qazaqstanmen saıası jáne qaýipsizdik máseleleri boıynsha da ekijaqty jáne kópjaqty baılanysty tereńdete túsýdiń mańyzy aıryqsha.

«Elderińiz Qytaı jáne Reseımen tyǵyz qarym-qatynas ornatqan. Osy turǵyda AQSh elderińizben áriptestik ornatýǵa múddelik tanytady. Biz Qazaqstannyń EQYU elderimen baılanysyn joǵary baǵalaımyz. Birneshe jyl buryn Sizder Dúnıejúzilik saýda uıymy qataryna kirdińizder. Bul ekonomıkalaryńyzǵa óte tıimdi bolǵany anyq», - dedi Denıel Rýnde.

Sonymen qatar ol Qazaqstan men AQSh arasyndaǵy baılanysty nyǵaıtý úshin qandaı sharalardy júzege asyrý qajettigin de atap ótti.

«Halyq pen halyqtyń, bıznes ókilderiniń ózara qarym-qatynasy jolǵa qoıylǵany jón. Sondaı-aq, amerıkalyq alpaýyt kompanııalar ǵana emes, kishigirim kásiporyndar da elderińizde jumys isteýge múmkindik bolýy tıis. Prezıdent Nazarbaevtyń sapary osy áriptestikterdi nyǵaıtýǵa jasalǵan qadam dep oılaımyn», - dedi amerıkalyq sarapshy.