AQSh Qazaqstandaǵy prezıdent saılaýynyń ádil ótýin baqylaıdy - Djýdı Kýo

NUR-SULTAN. QazAqparat – Amerıka Qurama Shtattary Qazaqstandaǵy prezıdent saılaýyn asyǵa kútedi jáne saılaýdyń ádil ótýin baqylaıdy. Bul týraly AQSh-tyń Qazaqstandaǵy ýaqytsha senimdi ókili Djýdı Kýo habarlady, dep habarlaıdy QazAqparat tilshisi.

«Biz Qazaqstan Prezıdenti Qasym-Jomart Toqaevtyń Joldaýyn muqııat tyńdadyq jáne onyń órshil bastamalary men reformalaryn qoldaımyz. Elde prezıdent saılaýy ótetinin estý biz úshin óte qyzyq boldy. Biz bul saılaýdy asyǵa kútemiz jáne onyń ádil ótýin qadaǵalaımyz. AQSh 30 jyl boıy Qazaqstannyń senimdi seriktesi bolǵanyn jáne jaqyn dos pen seriktes retinde Qazaqstannyń táýelsizdigi men aýmaqtyq tutastyǵyn árdaıym qoldap kelgenin aıta keteıin. Biz reformalar jolynda Qazaqstanǵa qajetti qoldaýdy usynýǵa daıynbyz», - dedi AQSh-tyń Qazaqstandaǵy ýaqytsha senimdi ókili.

Djýdı Kýo AQSh-tyń túrli baǵdarlamalar arqyly Qazaqstandy qoldaıtyn kóptegen tetikter bar ekenin atap ótti. ıAǵnı, qorǵanys jáne basqa da ónerkásip sektorlarynda kómektiń tolyq spektri bar.

Aıta keteıik, búgin Memleket basshysy Parlament palatalarynyń birlesken otyrysynda Qazaqstan halqyna Joldaýyn jarııalady.

Joldaýdyń negizgi bóligi elimizdiń áleýmettik-ekonomıkalyq damýyna arnalǵan.

Foto: www.wikidata.org