AQSh - Qazaqstan ekonomıkasyna ınvestıtsııa salyp otyrǵan TOP-3 eldiń bireýi

ASTANA. QazAqparat – AQSh Qazaqstan ekonomıkasyndaǵy negizgi ınvestorlardyń úshtigine kiredi, dep habarlaıdy QazAqparat tilshisi.

Ekonomıkalyq zertteýler ınstıtýtynyń málimetinshe, 2005 jyldan bastap AQSh-tan tartylǵan tikeleı shetel ınvestıtsııasynyń jalpy aǵyny 48,8 mlrd dollardy qurady.

Bul - Qazaqstanǵa tartylǵan barlyq sheteldik ınvestıtsııalardyń shamamen 13,5 paıyzy.

AQSh el ekonomıkasynyń negizgi 3 ınvestorynyń qataryna kiredi.

Amerıkalyq ınvestorlar taý-ken óndirý sektoryna kóbirek qyzyǵýshylyq tanytady.

Elimizdiń taý-ken óndirý ónerkásibindegi barlyq tikeleı shetel ınvestıtsııasynyń shamamen 30 paıyzy amerıkalyqtarǵa tıesili.

AQSh-tan tikeleı ınvestıtsııalardyń azdaǵan kólemi qarjy jáne saqtandyrý qyzmetinde (úlesi 6,6%) jáne geologııalyq barlaýda (9,8%) tirkelgen.

2022 jylǵy 1 qańtardaǵy jaǵdaı boıynsha elimizde amerıkalyq kapıtaldyń qatysýymen shamamen 695 kásiporyn tirkelgen.

Onyń 658-i - shaǵyn, 15-i - orta jáne 22-si - iri kásiporyndar.

Qazaqstandyq-amerıkalyq 168 kásiporyn kóterme-bólshek saýdada, 181 kompanııa ózge qyzmet túrlerinde, al 83 kompanııa kásibı, ǵylymı jáne tehnıkalyq qyzmette shoǵyrlanǵan.

Óńdeý ónerkásibinde barlyǵy 36 amerıkalyq kásiporyn bar.