AQSh Qasym-Jomart Toqaevtyń saıası reformalaryn qoldaıdy

NUR-SULTAN. QazAqparat – Qazaqstan men AQSh joǵarǵy deńgeıdegi strategııalyq seriktestikti keńeıtýge nıetti. Bul týraly QR Syrtqy ister mınıstriniń birinshi orynbasary Aqan Rahmetýllın aıtty, dep habarlaıdy QazAqparat tilshisi.

«Búgin AQSh Memlekettik hatshysynyń azamattyq qaýipsizdik, demokratııa jáne adam quqyqtary jónindegi orynbasary Ýzra Zeıanyń sapary aıasynda QR Prezıdenti Ákimshiligi basshysynyń orynbasary – QR Prezıdentiniń Halyqaralyq yntymaqtastyq jónindegi arnaıy ókili Erjan Qazyhannyń teń tóraǵalyǵymen Qazaqstan men AQSh arasyndaǵy adam quqyqtary men demokratııalyq reformalar jónindegi joǵary deńgeıdegi dıalogtyń birinshi otyrysy ótti. Bul tetik ekijaqty qarym-qatynasqa qosymsha serpin beredi jáne Qazaqstannyń demkoratııalyq kún tártibin ilgeriletýge baǵyttalǵan», - dedi ol.

Onyń atap ótýinshe, shara barysynda taraptar BUU-nyń Adam quqyqtary jónindegi keńesindegi yntymaqtastyq, dinı senim bostandyǵy, Qazaqstandaǵy saıası reformalar, halyqtyń áljýaz tobynyń quqyǵyn qorǵaý jáne yqpaldastyrý, adam saýdasyna qarsy is-qımyl máseleleri talqylanǵan.

Sonymen qatar áıelderdiń, múmkindigi shekteýli adamdardyń quqyqtary men múmkinshilikterin keńeıtý, qaýipsizdik, quqyq qorǵaý salalaryndaǵy yntymaqtastyq, jemqorlyqpen kúres máseleleri qozǵaldy.

«Prezıdent Qasym-Jomart Toqaev bastamashylyq jasaǵan eldi odan ary demokratııalandyrýǵa, adam quqyqtarynyń saqtalýyn qamtamasyz etýge baǵyttalǵan saıası reformalarǵa basa mán berildi. Amerıkalyq tarap Memleket basshysynyń saıası jáne áleýmettik-ekonomıkalyq salalardaǵy, memlekettik ınstıtýttardaǵy saıasatyn odan ary júzege asyrýǵa qoldaý bildirdi. Qazaqstan men AQSh syndarly yntymaqtastyqty odan ary qoldaýǵa jáne joǵary ári joǵarǵy deńgeıdegi strategııalyq seriktestikti keńeıtýge nıetti», - dedi Aqan Rahmetýllın.