AQSh qarjy mınıstrligi memlekettik qaryz shegi merzimin aýystyrdy

VAShINGTON. QazAqparat – AQSh Qarjy mınıstri Djanet Iellen juma kúni eger Kongress memlekettik qaryz shegin 5 maýsymǵa deıin kótermese el úkimeti barlyq shotyn ýaqytynda tóleı almaıtynyn eskertti, dep habarlaıdy QazAqparat CNN-ge silteme jasap.

Ókilder palatasynyń spıkeri Kevın Makkartı men basqa da Kongress kóshbasshylaryna jazylǵan hatta Iellen hanym amerıkalyq zań shyǵarýshylarǵa memlekettik qaryzdyń shekti somasyna baılanysty kelisim ornatý úshin naqty shekti merzimdi kórsetti. Shekti somma degenimiz – AQSh úkimeti shyǵyndaryn óteý úshin zańdy túrde qaryzǵa ala alatyn qarjy.

Buǵan deıin Iellen AQSh úkimetiniń aqshasy 1 maýsymda taýsylyp qalýy múmkin ekenin boljaǵan. Eldegi jetispeýshilikti qysqartýǵa tyrysyp jatqan AQSh prezıdenti Djo Baıden men Kongresstegi Respýblıkalyq partııa ókilderi áli de elde buryn-sońdy bolmaǵan defolttyń aldyn alý týraly sheshimge qatysty kelispeýshilikterdi joıýǵa tyrysyp jatyr.

«Eń keıingi qoljetimdi derekterdi negizge alsaq, eger Kongress memlekettik qaryz shegin 5 maýsymǵa deıin kótermese nemese toqtata turmasa úkimettiń mindetin oryndaýǵa qazynada qarjy jetkiliksiz bolmaq», - dep atap ótti Iellen hatynda.

Sondaı-aq ol 130 mıllıard AQSh dollarynan astam qarjy, jospar boıynsha, aldaǵy aıdyń alǵashqy eki kúninde áleýmettik qamtamasyz etýge jumsalatynyn jazdy, al 5 maýsymnan bastap 1 apta ishinde qosymsha shyǵyndarǵa shamamen 92 mıllıard AQSh dollary kerek.

Sonymen qatar qarjy mınıstri Kongress basshylaryn kelisimge tezirek kelýge shaqyryp, «memlekettik qaryzdyń shegin tómendetýdi nemese ulǵaıtýdy sońǵy mınýtqa deıin kútý bızneske jáne tutynýshylardyń senimine aıtarlyqtaı zııan keltirip, salyq tóleýshiler úshin qysqa merzimdi qaryz alý qunyn arttyryp, AQSh-tyń nesıe reıtıngine teris áser etýi múmkin ekenin» aıtty.