AQSh-qa tikeleı reıstiń ashylýy talapqa saı ushaqtyń bolýyna baılanysty - Pıter Foster

<p>ALMATY. KAZINFORM - Air Astana tobynyń prezıdenti Pıter Foster qazaqstandyq áýe kompanııanyń AQSh-qa tikeleı reıs ashýǵa qanshalyqty daıyn ekenin aıtty.</p>

Kazinform tilshisi Air Astana áýe kemeleri muhıt asyp AQSh-qa ushýyna qanshalyqty daıyn ekenin surady.

- Bul 787 Boeing áýe kemesiniń jetkizilýine baılanysty. Ózderińiz biletindeı, Boeing kompanııasynyń jetkizý qyzmeti kúni keshe aıaqtalǵan ereýilden zardap shekti. Sondyqtan aıtylǵan áýe kemesi 2025 jyldyń aıaǵy ne 2026 basynan erte jetkizilýi ekitalaı. Osyny eskere otyryp, AQSh-qa tikeleı reısterdiń ashylýy talapqa saı ushaqtyń bolýyna baılanysty dep aıta alamyn, - dedi kompanııa prezıdenti.

Sondaı-aq, Pıter Foster boljamdaǵy áýe baǵytynyń baǵasy týraly aıtty.

- Biz bul baǵyttaǵy reıstiń baǵasyn áli eseptemedik, sebebi bul alys jospar. 787 Boeing áýe kemesiniń jetkizilýiniń naqty ýaqyty belgili bolǵan kezde biz baǵa týraly sheshim qabyldaı alamyz. Árıne, AQSh tikeleı reısine suranys bar jáne tek Qazaqstan tarapynan ǵana emes, jalpy Ortalyq Azııadan bar. Naqty aıtarym, AQSh-tan buryn 2026 jyldyń naýryzynda Tokıoǵa reıs ashylady, - dedi ol.

Eske salaıyq, buǵan deıin senator elimizdegi ushaq reısteriniń jappaı keshigýine shaǵym kóbeıgenin aıtqan edi.