AQSh-qa tikeleı áýe reısin ashý: Amerıkalyq sarapshylar elordaǵa keldi
TSA sarapshylary elordalyq áýejaıdyń tekserý pýnktteriniń jaǵdaıyn baǵalady.
Bul - TSA sarapshylarynyń elimizge jasaǵan ekinshi sapary. Alǵashqy sapar 2021 jyldyń qazan aıynda ótip, onda TSA sarapshylary eldegi avıatsııalyq qaýipsizdikti qamtamasyz etýdiń joǵary deńgeıin atap ótken bolatyn jáne azamattyq avıatsııany zańsyz aralasý aktilerinen qorǵaý boıynsha júrgizilip jatqan sharalarǵa oń baǵa berdi. Osy joly sarapshylar Nur-Sultan qalasy áýejaıynyń jolaýshylardy, qol júgin, bagajdy jáne júkti tekserý pýnktteri, sondaı-aq baqylaý-ótkizý pýnktteriniń jumysymen tanysty.
Sarapshylar AQSh-qa tikeleı reısterdi júzege asyrý kezinde tekserý pýnktteriniń jaǵdaıy men jabdyqtalýyna erekshe mán beredi. Tehnıkalyq sapardyń nátıjeleri boıynsha sarapshylar tekserý pýnktteri men baqylaý-ótkizý pýnktteriniń jaǵdaıyna oń baǵa berdi. Tekserý pýnkterinde avıatsııalyq qaýipsizdik qyzmeti personalynyń úılesimdi jumysy atap ótildi.
Bolashaqta AQSh-qa oryndalatyn reısterge qyzmet kórsetetin jekelegen tekserý pýnktteri úshin, olardy jolaýshylardy úsh ólshemdi skanerleý jabdyqtary (dene skanerleri) jáne jarylǵysh zat detektorlary sııaqty zamanaýı tehnıkalyq tekserý quraldarymen jabdyqtaý boıynsha usynystar berilgen.
AQSh elshiligi janyndaǵy Eksporttyq baqylaý jáne shekara qaýipsizdigi baǵdarlamasynyń ókilderi tekserý ınspektorlaryn TSA standarttary boıynsha oqytý jáne joǵaryda atalǵan baǵdarlamanyń qarajaty esebinen tekserý jabdyqtaryn óteýsiz satyp alý týraly máseleni qarastyrýda.
Tehnıkalyq sapardyń qorytyndysy boıynsha AQSh-qa tikeleı reıster ashý sheńberinde Qazaqstannyń avıatsııalyq ákimshiligi men AQSh kólik qaýipsizdigi ákimshiligi arasyndaǵy yntymaqtastyqty jalǵastyrý jáne keńeıtý týraly sheshim qabyldandy.
Eske salsaq, buǵan deıin Qazaqstan men AQSh ózara tikeleı áýe qatynasyn ashýdy josparlap otyrǵany týraly habarlandy.Foto:t.me/caa_kaz/KGA