AQSh Izraıl jaǵalaýyna myńdaǵan teńiz jaıaý áskerin jiberdi

<p>AQSh Izraıl jaǵalaýyna eki myń teńiz jaıaý áskerinen turatyn jedel áreket etý kúshin jiberdi, dep habarlaıdy Kazinform <a href="https://edition.cnn.com/middleeast/live-news/israel-news-hamas-war-10-16-23/index.html" target="_blank" rel="noopener">CNN</a>-ge silteme jasap.</p>

Jedel áreket etý toby aımaqtaǵy AQSh áskerine qosylady. AQSh osylaı Iranǵa Gaza sektorynda órship turǵan qaqtyǵystyń aımaqtyq qaqtyǵysqa ulasýyna jol bermeıtinin túsindirgisi keledi.

AQSh Taıaý Shyǵystaǵy ásker qataryn ulǵaıtyp, Jerorta teńiziniń shyǵysyna ekinshi úlken ushaq tasymaldaǵyshyn ornalastyrdy, sonymen qatar, aımaqqa áskerı-áýe kúshteriniń joıǵysh ushaqtaryn jiberdi.

Buǵan deıin AQSh Qorǵanys mınıstri Lloıd Ostın 2000-ǵa jýyq áskerdi Izraılge jiberýge daıyn bolýdy buıyrǵany habarlanǵan bolatyn.

Qazirdiń ózinde Jerorta teńiziniń shyǵysynda AQSh-tyń avıatasymaldaǵysh soqqy berýshi toby bar, al ekinshisi jolda.

Amerıkalyq tarap teńiz kúshteriniń qaıda baratynyn naqtylamady, biraq ol Izraıldiń ońtústik jaǵalaýyndaǵy Qyzyl teńizde qalýy múmkin, nátıjesinde AQSh kúshteri eldiń eki jaǵalaý syzyǵyna jaqyn ornalasady.

Seısenbi kúni AQSh memlekettik hatshysy Entonı Blınken AQSh prezıdenti Djo Baıdenniń sársenbi kúni Izraılge saparlaıtynyn habarlady.