AQSh gıperdybysty zymyrandy synaqtan ótkizdi

<p>ASTANA. KAZINFORM - Zymyran Florıda shtaty Kanaveral múıisindegi ǵarysh kúshteri áskerı bazasynan ushyryldy. Bul týraly AQSh&nbsp;<a href="https://www.defense.gov/News/Releases/Release/Article/3999835/army-and-navy-successfully-test-conventional-hypersonic-missile/" target="_blank" rel="noopener">Qorǵanys mınıstrligi</a> habarlady.</p>

Bul gıperdybysty AllUpRound (AUR) kesheniniń bıylǵy ekinshi ret sátti ótkizilgen synaǵy. Sondaı-aq bul batareıa basqarý ortalyǵy men ushyrý qurylǵysyn paıdalana otyryp, uzaq qashyqtyqqa baǵyttalǵan gıperdybysty júıeniń áskerı maqsatqa paıdalaný sharasy.

- Bul synaq bizdiń eń ozyq qarýlandyrý júıemizdi damytýdaǵy mańyzdy kezeń. Biz Conventional Prompt Strike(jyldam jahandyq soqqy) júıesin Áskerı-teńiz kúshteriniń sýústi jáne sýasty kemelerine ıntegratsııalaý boıynsha jumystardy jalǵastyramyz, - dedi Áskerı-teńiz kúshteriniń hatshysy Karlos Del Toro.

Gıperdybysty júıe dybys jyldamdyǵynan 5 ese tez ushady jáne jyldamdyq, qashyqtyq, ıkemdilik, bıiktik sııaqty múmkindikterdi ushtastyrady. Óz kezeginde ol kez kelgen qıyndyqtan ótip, jaqsy qorǵalǵan, erekshe mańyzdy nysandy joıýǵa múmkindik beredi.

Áskerı-teńiz kúshteriniń strategııalyq baǵdarlamalarynyń dırektory, vıtse-admıral kishi Djonnı Výlf bul synaq birlesken soǵys talaptaryn qanaǵattandyrý úshin revolıýtsııalyq gıper dybysty qarý júıesin jasaýǵa múmkindik bergen Áskerı-teńiz kúshteri men armııanyń sátti seriktestiginiń kórinisi ekenin atap ótti.

Osyǵan deıin KHDR-diń jańa ballıstıkalyq jáne jańartylǵan qanatty zymyrandardy synaqtan ótkizgeni týraly jazǵan edik.