AQSh elshisi shet elden aqsha alatyn qazaqstandyqtardyń tizimine qatysty pikir bildirdi
Búgin elordada AQSh elshisi tilshilermen dóńgelek ústel otyrysyn ótkizdi. Onda jýrnalıster Qazaqstandaǵy shetel qarjylandyratyn tulǵalar tizimi týraly elshiniń pikirin surady.
«Men bul tizim týraly estidim jáne bizdiń elshilik muny jiti baqylap otyr. Sondaı-aq biz osy tizim jarııalanǵannan keıingi túrli ÚEU men medıauıymdardyń reaktsııalaryn baqylap otyrmyz. Keı adamdar osy tizim men basqa elderdegi «sheteldik agentter» dep atalatyn zańdardy salystyrýda. Mundaı salystyrýlar nelikten jasalatynyn túsinemin, biraq qazirgi ýaqytta bul ártúrli nárse ekenin aıtqym keledi», – dep jaýap berdi D. Rozenblıým.
Elshiniń aıtýynsha, bul qazaqstandyq tizimde bolý ondaǵy uıymdar men adamdar úshin zańmen baılanysty esh másele týdyrmaıdy.
«Jáne bul olardyń kúndelikti jumysyna esh áser etpeıdi. Biz bul jaǵdaıdyń osy qalpynda bolýyn qalaımyz, sondyqtan bul uıymdardyń jumysyna esh kedergi bolmaıdy. Biz buǵan baqylaýdy jalǵastyramyz. Qazaqstan Úkimeti nemese úkimettik emes uıymdar ne aıtatynyn kóreıik. Eger bizde qandaı da bir alańdaýshylyq týyndasa, Úkimetpen sóıleskende bul taqyrypty mindetti túrde kóteremiz», – dedi dıplomat.
20 qyrkúıek kúni Memlekettik kirister komıteti bıylǵy birinshi jartyjyldyqta sheteldik kózderden aqsha nemese ózge de múlik alǵan tulǵalardyń tizimin jarııalady. Qujatqa ártúrli baǵytta jumys isteıtin 240 uıymnyń ataýy men azamattardyń esimi engen. Tizilimde uıymdar men jeke adamdardyń bıznes-sáıkestendirý nómirleri (BSN) jáne jeke sáıkestendirý nómirleri (JSN) kórsetilgen.
Keıin Qarjy vıtse-mınıstri Erjan Birjanov sheteldik kózderden aqsha alyp otyrǵan qazaqstandyqtardyń jeke derekterin jarııalaý máselesine túsinik bergen edi.