AQSh Elshiligi Qazaqstannyń zamanaýı ınstıtýttaryn nyǵaıtýǵa úles qosyp keledi — Djýdı Kýo

<p>ASTANA. KAZINFORM &mdash; AQSh Elshiliginiń qoldaýymen ótip jatqan qazaq tilinde onlaın-kontent jasaýshylardyń VII forýmynda AQSh-tyń Ýaqytsha senimdi ókili Djýdı Kýo Qazaqstan ozyq tehnologııa kóshin bastap kele jatqan elderdiń qatarynda ekenin atap ótti.</p>

«AQSh Elshiligi Qazaqstannyń jas memleket retinde damýyna qoldaý kórsetip, zamanaýı ınstıtýttaryn nyǵaıtýǵa úles qosyp keledi. Qala berdi, jańa ekonomıkalyq múmkindikterdi ashý baǵytynda Qazaqstan úkimeti, azamattyq qoǵamy jáne jeke sektordaǵy áriptesterimizben 30 jyldan astam ýaqyt boıy baıandy baılanys ornatylǵan. Biz Qazaqstannyń jas memleket retinde órkendeýi úshin óziniń baı murasynyń tildik jáne mádenı dástúrlerin qabyldap, qundylyqtardyń HHІ ǵasyrdaǵy órkenıetpen úılesim tabatynyna senimdimiz. Búginde demokratııasy artqan Qazaqstan Ortalyq Azııanyń kúshti derjavasyna aınalyp, beıbitshilikke jol bastaıdy», — dedi Djýdı Kýo.

Qazaqstannyń strategııalyq zertteýler ınstıtýtynyń dırektory Erkin Tuqymov jasandy ıntellekt pen jańa tehnologııalardyń damýy qazaqstandyqtardyń ómirine qalaı áser etetinin aıtyp berdi.

«Biraz ýaqyt buryn smartfondardyń ómirimizdiń ajyramas bóligine aınalatynyn bildik pe? Jasandy ıntellekt te dál solaı birtindep turmysymyzǵa enip keledi. Tipti, shynaıy ómir men vırtýaldy álemniń ara-jigin ajyratý qıynǵa soǵýda. Jasandy ınteldekten týyndaıtyn qaýip-qaterdi umytpaǵan jón. Aldaǵy ýaqytta JI adammen sanaspaı, ózi sheshim qabyldaıtyn deńgeıge jetýi múmkin. Biz buǵan daıyn bolýymyz kerek», — dedi ol.

Belgili bolǵandaı, álemde jasandy ıntellekttiń qatysýymen 4 trln AQSh dollaryna baǵalanatyn taýarlar óndiriledi eken. Al, 2030 jylǵa qaraı barlyq kórsetiletin qyzmetterdiń 70 paıyzy JI arqyly retteledi degen boljam bar.