AQSh elshisi Ýılıam Mozer Semeı synaq polıgonyna keldi

SEMEI. QazAqparat - AQSh elshisi Ýılıam Mozer men AQSh Qorǵanys mınıstrligi Qaýip-qaterdi azaıtý jónindegi agenttiginiń (DTRA) dırektory Veıl Oksford Semeı synaq polıgony alańyna keldi, dep habarlaıdy QazAqparat.

Kýrchatov qalasyna saparmen kelgen AQSh elshisi Ýılıam Mozer «Baıkal-1» zertteý reaktorlary keshenine bardy. Onda atom energetıkasyn damytý salasyndaǵy jáne ıadrolyq qarýdy taratpaý máselelerin sheshýdegi qazaqstandyq-amerıkalyq yntymaqtastyq sheńberindegi jobalardy júzege asyrý barysymen tanysty. Atap aıtqanda, BN-350 reaktorynyń paıdalanylǵan ıadrolyq otynyn tasymaldaý jáne saqtaý jónindegi biregeı jobany iske asyrý, obektilerdiń fızıkalyq qaýipsizdigin qamtamasyz etý nátıjeleri usynyldy. Sondaı-aq, zertteý reaktorlaryn tómen baıytylǵan otynǵa konversııalaý boıynsha aǵymdaǵy jumystarmen tanysty.

QR Ulttyq ıadrolyq ortalyǵy men AQSh uıymdarynyń ıadrolyq synaqtardy júrgizý ınfraqurylymdaryn joıý jónindegi alǵashqy jumystary «Jappaı qyryp-joıatyn qarý ınfraqurylymyn joıý» jónindegi kelisim sheńberinde 1996-2000 jyldar aralyǵynda júrgizildi.

«2000 jyldan bastap jumystar úshjaqty negizde (QR-AQSh-RF) júrgizildi. Nátıjesinde ıadrolyq qyzmet qaldyqtary bar synaq uńǵymalary konservatsııalandy. «Kolba» konteınerleri kómildi, eki obektiden arnaıy tehnologııalyq jabdyqtar alynyp, Reseıge áketildi. Barlyq josparlanǵan shtolnıalyq obektilerde ıadrolyq qyzmet qaldyqtaryn baılanystyrý jáne fızıkalyq tosqaýyldardy kúsheıtý jumystary tolyǵymen aıaqtaldy. Sondaı-aq, DTRA ókilderimen birge SSP synaq alańdarynda úsh deńgeıli fızıkalyq qorǵaýdyń zamanaýı júıesi quryldy» delingen QR Ulttyq ıadrolyq ortalyǵy taratqan aqparatta.