AQSh Elshiligi elimizdegi kilem toqý dástúrin qaıta jańǵyrtý úshin grant bóldi
dep habarlaıdy QazAqparat.
Elshiniń aıtýynsha, Qor ismer áıeldermen jumys isteı otyryp, kilem toqý óneriniń ulttyq erekshelikterin jańǵyrtyp qana qoımaı, daıyn buıymdardy álemdik naryqqa saýdaǵa shyǵarýdyń qyr-syryn da úıretpek.
«2001 jyldan beri AQSh Kongresiniń sheshimimen qurylǵan Mádenı murany saqtaý qory álemniń 100-den astam elinde jalpy somasy 26 mıllıon dollardy quraıtyn 640 jobany qarjylandyrdy. Amerıka halqynyń búkil álemdegi mádenı muraǵa degen qurmetiniń belgisine aınalǵan bul Qor alýan túrli jobalarǵa qoldaý bildirýde, sonyń ishinde, ásirese tarıhı ǵımarattardy qalpyna keltirý, murajaı jádigerlerin baǵalaý jáne saqtaý, arheologııalyq oryndardy qorǵaý, joıylyp bara jatqan ulttyq dástúrlerdi jańǵyrtý, muraǵattar men qoljazbalardy saqtaý jáne joıylý qaýpi tónip turǵan tilderdi damytý sııaqty bastamalarǵa kóbirek kóńil bóledi», dep atap ótti Rıchard Hoýgland.
Onyń aıtýynsha, 2005-2008 jyldar aralyǵynda grant bólýshi Qor elimizde úsh birdeı úzdik jobaǵa qoldaý kórsetken. «Olar Almaty qalasyndaǵy Ortalyq memlekettik muraǵattaǵy fılmderdi qalpyna keltirýge at salysyp, ol úshin 28 myń AQSh dollaryn bóldi. Ekinshi - Uly Jibek jolynyń boıynda jatqan, mádenı qundylyǵy asa joǵary tabıǵı parkterdi qujattaý jobasyna 28 881 AQSh dollaryn bólse, úshinshi jobada HH-shy ǵasyrdaǵy qazaq mýzykasynyń úntaspalaryn saqtaýǵa, Qurmanǵazy atyndaǵy Ulttyq konservatorııaǵa 28 790 AQSh dollaryn bóldi», dedi AQSh-nyń Qazaqstandaǵy elshisi Rıchard Hoýgland.
Úkimettik emes «Bizdiń mura» uıymynyń basshysy Aıjan Bekqulovanyń aıtýynsha, joba negizinen dástúrli ulttyq kilem toqýdy saqtaýǵa jáne sheberlerge marketıngtiń qyr- syryn úıretýge baǵyttalǵan. «Oǵan Ońtústik Qazaqstan óńiriniń áıelderi qatysatyn bolady. Onda 35 jastan asqan jumyssyz áıelder kóp. Bul joba olar úshin úıde otyryp-aq, naryqta qajetti bolýǵa kómektesedi jáne elimizdegi kilem toqý dástúrin qaıta jańǵyrtýǵa úlesin qosatynyna senimdimin», dep atap ótti ol.