AQSh Caýda mıssııasy resmı saparmen Qazaqstanǵa keldi

ASTANA. QazAqparat – AQSh Saýda palatasy, Saýda mınıstrligi jáne Qazaqstannyń AQSh-taǵy Elshiligi uıymdastyrǵan sertıfıkattalǵan amerıkalyq saýda mıssııasynyń Qazaqstanǵa birinshi sapary ótti. Oǵan 20-dan astam iri amerıkalyq kompanııalar, atap aıtqanda ExxonMobil, Boeing, GE, Baker Hughes, Citibank, Google, Microsoft, Apple jáne basqalar qatysty, dep habarlaıdy QazAqparat.

Baǵdarlama aıasynda bıznes-delegatsııa Qazaqstan-Amerıka ınvestıtsııalyq dóńgelek ústel, QR Prezıdenti janyndaǵy Sheteldik ınvestorlar keńesiniń otyrysy, AHQO uıymdastyrǵan Astana halyqaralyq forýmyna jáne Astana Finance Days is-sharalaryna qatysyp, G2B jáne B2B formatynda kezdesýler ótkizdi.

Mıssııanyń negizgi maqsaty – Memleket basshysynyń tóraǵalyǵymen 2022 jyly Nıý-Iorkte ótken Qazaqstan-Amerıka dóńgelek ústeliniń jalǵasy retinde Qazaqstan men AQSh arasyndaǵy ınvestıtsııalyq jáne saýda qatynastaryn nyǵaıtý jáne kúsheıtý.

Dóńgelek ústel qatysýshylarǵa qoldanystaǵy ınvestıtsııalyq jobalardyń damýy men energetıka, ınfraqurylym, aýyl sharýashylyǵy jáne tsıfrlyq ekonomıka sııaqty salalarǵa eldegi ınvestıtsııany arttyrý perspektıvalaryn talqylaýǵa múmkindik berdi.

Bıznes-delegatsııa músheleri QR Úkimetiniń elde qolaıly ınvestıtsııalyq ahýal qurý jónindegi kúsh-jigerin joǵary baǵalap, ınvestıtsııalyq bastamalardy júzege asyrýdyń áleýetin erekshe atap ótti.

Sonymen birge qatysýshylar ózara saýda ósiminiń oń serpinine qanaǵattanatynyn atap ótti.

Osylaısha, 2022 jylǵy taýar aınalymy 3,05 mlrd AQSh dollaryn qurap, rekordtyq kórsetkishke jetti, bul ótken jylmen salystyrǵanda 37%-ǵa joǵary.

AQSh-tyń Qazaqstanǵa jalpy TShI aǵyny 2022 jylmen salystyrǵanda 82%-ǵa ósip, 5,1 mlrd AQSh dollaryn qurady.

Óz tarapynan AQSh Saýda palatasynyń aǵa vıtse-prezıdenti Hýsh Choksı amerıkalyq kompanııalardyń qazaqstandyq naryqta qatysýyn keńeıtýge tereń qyzyǵýshylyq tanytty.

Saýda mıssııasynyń QR Ulttyq ekonomıka mınıstri Álibek Qýantyrov, Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın, Ǵylym jáne joǵary bilim mınıstri Saıasat Nurbek, Energetıka mınıstri Almasadam Sátqalıev jáne Aýyl sharýashylyǵy mınıstri Erbol Qarashúkeevpen ótken kezdesýlerinde elimizdiń ınvestıtsııalyq ahýalyn odan jaqsartý sharalardy talqylaý basty nazarǵa alyndy.

AHQO men Astana Hub-qa saparmen qatar, AHQO basqarýshysy Renat Bekturovpen, QR Syrtqy ister mınıstriniń orynbasary Almas Aıdarovpen jáne QR Saýda jáne ıntegratsııa vıtse-mınıstri Qaırat Tórebaevpen jeke kelissóz júrgizildi.