AQSh Belarýsti quny básekege qabiletti munaımen qamtamasyz etýge daıyn - Pompeo
Bul týraly AQSh-tyń Memlekettik hatshysy Maık Pompeo búgin Mınskide Belarýs Prezıdenti Aleksandr Lýkashenkomen júrgizgen kelissózderden soń aıtty, dep habarlaıdy QazAqparat BELTA-ǵa silteme jasap.
«Biz ekonomıkalyq máseleler boıynsha uzaq kelissózder júrgizdik. Lýkashenko myrza belarýstardyń óz táýelsiz memleketi bar ekenin jáne olardyń qandaı da bir memlekettiń bólshegi bola almaıtynyn aıtty. Amerıka Qurama Shtattary Belarýsqa táýelsiz memleket bolýǵa kómektesýge daıyn. Bizdiń energoresýrs óndirýshilerimiz baǵasy 100 paıyz básekege qabiletti munaımen qamtamasyz etýge daıyn. Biz álemdegi energoresýrs óndiretin eń iri elmiz. Ony bizden suraý jetkilikti»,-dep atap ótti Memlekettik hatshy.
Onyń sózinshe, amerıkalyq kásiporyndardyń Belarýs naryǵyna shyǵýy úshin memleketterge azdaǵan kedergilerden ótý kerek.
Saıasatker DSU-ǵa kirý jáne jeke sektordyń belsendiligi Belarýs eline óziniń áleýetin ashýǵa yqpal etetinine senimdi.
Memlekettik hatshy sonymen qatar, eki el arasyndaǵy qaýipsizdik máselesi boıynsha da sátti yntymaqtastyq ornyqqanyn jáne bolashaqta bul baılanystar keńeıe beretininen úmitti ekenin aıtty.
Maıkl Pompeo sondaı-aq AQSh Memlekettik hatshysynyń Belarýs eline saparyn uıymdastyrýdyń sáti baıaǵyda-aq týǵandyǵyn aıtty.
«Biz AQSh tarıhyn este ustaýymyz qajet. AQSh 1991 jyly Belarýstiń táýelsizdigin moıyndaǵan alǵashqy memleketterdiń biri. Biz áli de osy ustanymdamyz jáne bolashaqta bizdiń qarym-qatynastarymyz tereńdeı beredi degen úmittemiz»,-dep málimdedi ol.