AQSh bankine pandemııa kezinde járdemaqy tólemegeni úshin 225 mıllıon dollar aıyppul salyndy
AQSh Qarjy mınıstrliginiń valıýtalyq qadaǵalaý basqarmasy AQSh-tyń ekinshi iri bankin aldyn ala tólengen karta baǵdarlamasyna baılanysty alaıaqtyqtan zardap shekkenderge 125 mln dollar kóleminde ótemaqy tóleýge mindettedi. Tutynýshylardyń qarjylyq quqyqtaryn qorǵaý bıýrosy sonymen qatar bankti «pandemııa kezinde jumyssyzdyq boıynsha járdemaqyny tóleı almady» dep aıyptap, qosymsha 100 mln dollar aıyppul saldy.
Tutynýshylardyń qarjylyq quqyqtaryn qorǵaý bıýrosy Amerıka banki alaıaqtyqty anyqtaý baǵdarlamasy arqyly adamdardyń shottaryn avtomatty túrde jáne zańsyz buǵattaǵanyn málimdedi. Sonyń saldarynan 12 shtat: Arızona, Kalıfornııa, Aıova, Kanzas, Kentýkkı, Massachýsets, Merılend, Mıchıgan, Nıý-Djersı, Nevada, Soltústik Karolına jáne Ońtústik Karolınada shamamen 100 myń karta ustaýshy azamat zardap shekti.
Óz kezeginde Amerıka bankiniń ókilderi 2020 jáne 2021 jyldary memlekettik júıeler tólemderdi maquldaýǵa arnalǵan jalǵan ótinishterge toly bolǵanyn atap ótti. Osyǵan qaramastan, bank 14 mıllıonnan astam adamǵa pandemııalyq jumyssyzdyq boıynsha 250 mlrd dollardan astam somaǵa járdemaqy berýge kómektesti jáne kez kelgen basqa qarjy ınstıtýtyna qaraǵanda amerıkalyqtarǵa kóbirek jeńildik berdi.
Qazirgi ýaqytta bankke jeke tulǵalar shyǵynyn óteý josparyn usyný úshin 90 kún ýaqyt berildi.
Foto: greeceinvestorguide.com