AQSh azamaty men aqmolalyq sheneýnikter 1 mlrd teńgeden astam aqshany jymqyrǵan
Qylmystyq isti tergeý aıasynda oblystyń arnaıy prokýrorlarynyń ótinishi boıynsha Aqmola oblystyq sotynyń qaýlysymen memleket paıdasyna AQSh azamaty «G.ıÝ.A.» múlki tárkilendi.
Tergeý barysynda Býrabaı jaǵalaýynda ornalasqan jer ýchaskesi bar jeke klınıkanyń jańa ǵımaraty men «Leksýs» markaly avtokóliktiń zańsyz satyp alynǵany anyqtaldy.
«AQSh azamatshasy «G.ıÝ.A.» klınıkalar jelisiniń ıesi bola tura, Densaýlyq saqtaý basqarmasynyń burynǵy basshylarymen sybaılasyp, memlekettik-jekemenshik áriptestik sharty sheńberinde eski medıtsınalyq jabdyqty 1 167 513 600 teńge somasyna jańa retinde jetkizý arqyly bıýdjet qarajatyn jymqyrdy dep kúdikke alyndy. Buǵan qosa, bul medıtsınalyq jabdyqtardyń bir bóligi jumys istemeıtindigi anyqtaldy. Keıinnen ol osy aqshaǵa jańa emhana ǵımaratyn 890 mln teńgege salyp, ony memleketke 4,5 mlrd teńgege satýǵa tyrysqan», - dedi vedomstvodan.
Prokýratýranyń baspasóz qyzmetinen atap ótkendeı, «G.ıÝ.A.» 2021 jylǵy sáýirde qylmystyq is tirkelgenge deıin Qazaqstan Respýblıkasynyń shekarasynan ótip ketken. Osyǵan baılanysty, oǵan syrttaı kúzetpen ustaý bultartpaý sharasy qoldanyldy. Oǵan halyqaralyq izdeý jarııalandy.
«Aqmola oblystyq sotynyń 2.06.2023 jylǵy qaýlysymen (zańdy kúshine endi) memleket paıdasyna joǵaryda atalǵan múlik tárkilendi. Óz kezeginde Aqmola oblysy Densaýlyq saqtaý basqarmasynyń burynǵy basshylaryn aıyptaý boıynsha negizgi qylmystyq is sotta. Olar kúzetpen ustalyp otyr», - dep tolyqtyrdy vedomstvodan.
Aıta ketsek, Aqmola oblysynyń arnaıy prokýrorlary respýblıka boıynsha alǵash ret halyqaralyq izdeýde júrgen adamnyń múlkine sot úkimi shyqqanǵa deıin tárkileý tetigin qoldanyp otyr.
Eske sala keteıik, budan buryn Aqmola oblysynda laýazymdy tulǵaǵa para bergen ákim sottalǵanyn jazǵan edik.