AQSh aspanyndaǵy qytaılyq aerostat: Baıdenniń jaýaby qandaı bolmaq

ASTANA. QazAqparat – AQSh prezıdenti Djo Baıden eldiń aýmaǵynda, sonyń ishinde ıadrolyq zymyrandardy basqarý bazasynyń ústinde Qytaı áýe sharynyń paıda bolýyna qandaı dıplomatııalyq jaýap berý kerektigin sheshýi kerek. Amerıkalyq taraptyń paıymdaýynsha, ol barlaý maqsatynda arnaıy jiberilgen, dep habarlaıdy QazAqparat Euronews-ke silteme jasap.

Respýblıkashyldar Baıdendi áýe sharyn atyp túsirýge erte buıryq berdi dep synǵa aldy. Al, Aq úıdiń málimdeýinshe, beıbit turǵyndarǵa qaýip kelmeýi kózdelgen.

«Men sársenbi kúni ony atyp túsirýge buıryq berdim. Maǵan onyń qaýipsiz jerge barǵanyn kúte turý usynyldy», - dedi Baıden.

Al, «Bul Qytaımen qarym-qatynasqa qalaı áser etedi?» degen suraqqa Baıden jaýap bermedi.

Respýblıkashyldar prezıdentti Qytaıǵa qatysty jumsaqtyǵy úshin aıyptap otyr. Ázirge oqıǵanyń jalǵyz saldary – memlekettik hatshy Entonı Blınkenniń Beıjińge resmı saparynyń toqtatylýy, onda ol Sı Tszınpınmen kezdesýi kerek edi.

Eske salaıyq, 4 aqpanda AQSh Ońtústik Karolına jaǵalaýynda Atlant muhıtynyń ústinen ushyp bara jatqan Qytaı aerostatyn atyp túsirgen bolatyn.

Buǵan deıin AQSh aspanynda jumbaq shar paıda bolyp, ony Pentagon «tyńshylyq jasap júrgen Qytaıdyń obektisi» dep málimdegen.

Beıjiń munyń qate ekenin aıtyp, asyǵys sheshim qabyldamaýǵa shaqyrdy. Qytaı AQSh-qa atyp túsirilgen aerostatqa qatysty narazylyq bildirdi jáne bul jaı ǵana adasyp ketken meteozond ekenin málimdedi. Onyń qaldyqtary Atlant muhıtyna túsken, ári qaraı zertteý úshin shyǵaryp alý jumystary bastaldy.