Aqsaı qalasynda kópqabatty úı órtendi

ORAL. QazAqparat – Aqsaı qalasynda kópqabatty úıden órt shyqty, dep habarlaıdy QazAqparat tilshisi.

BQO TJ departamentiniń baspasóz qyzmetinen málim etkenindeı, oqıǵa 29 shilde kúni Bórli aýdany ortalyǵy Aqsaı qalasynda bolǵan.

«Saǵat 15.01-de 5-shaǵynaýdan 38-mekenjaıda 6-qabatta 39-páterdiń balkony men zaly, jeke zattar otqa orandy. Aldyn ala málimet boıynsha órt aýmaǵy 30 sharshy metrdi qamtydy. Zardap shekkender joq. «Tilsiz jaý» saǵat 15.20-da oqshaýlanyp, 15.54-te aýyzdyqtaldy. Órtti sóndirýge 14 adam men 3 tehnıka jumyldyryldy», - dep habarlady vedomstvodan.

Departament málimetine qaraǵanda, jyl basynan beri óńirde 323 órt tirkelse, sonyń 193-i turǵyn úıde bolǵan. Órt saldarynan 8 adam qaza taýyp, beseýi jaraqat aldy.

Sondaı-aq 36 mıllıon teńgeden astam materıaldyq shyǵyn kelgen.