Aqsaı qalasynda Abaıdyń eskertkishi ornatylady
BQO mádenıet basqarmasy basshysynyń mindetin atqarýshy Saıran Dúısenteginiń aıtýynsha, eskertkishtiń eskızdik jobalary oblystyq komıssııadan ótip, QR Mádenıet jáne sport mınıstrligine jiberildi.
«Respýblıkalyq komıssııa qaraǵannan keıin jumys ári qaraı jalǵasatyn bolady», dedi QazAqparat tilshisine S.Dúısentegi.
Oblystyq tilderdi damytý basqarmasy buqaralyq aqparat quraldary jáne memlekettik emes uıymdarmen jumys bóliminiń basshysy Sveta Ǵanıevanyń sózine qaraǵanda, óńirde Abaıdyń 175 jyldyǵyna oraı merekelik is-sharalar jospary jasaldy.
Arnaıy qurylǵan jumys toby túrli formattaǵy 861 is-sharany bekitti. Sonyń ishinde tórteýi – halyqaralyq, altaýy – respýblıkalyq, qalǵandary – oblystyq, qalalyq, aýdan, aýyldyq deńgeıde ótetin sharalar.
Abaıdyń 175 jyldyǵyna arnalǵan sharalar qańtar aıynda-aq bastalyp ketti. Degenmen resmı túrde 18 aqpan kúni H.Bókeeva atyndaǵy oblystyq qazaq drama teatrynda ótetin «Abaı murasy – qazaqtyń rýhanı qazynasy» atty saltanatty sharadan bastaý alady.
Sondaı-aq Oralda halyqaralyq deńgeıde «Abaı murasy – álemdik mádenıet qazynasy», «Abaı Qunanbaev: HHІ ǵasyrdaǵy bilim jáne ǵylym» atty konferentsııa, «Abaı-Pýshkın» atty jastar forýmyn uıymdastyrý josparlansa, Shyńǵyrlaý aýdanynda «Abaı álemi: qazaq ádebıeti men tiliniń búgini, bolashaǵy» taqyrybynda respýblıkalyq ǵylymı-tájirıbelik konferentsııa ótedi. Qaztalov aýdanynda «Abaı jáne Pýshkın» halyqaralyq konferentsııasyn ótkizý oılastyrylýda.
Oǵan qosa oblys ortalyǵyndaǵy Abaı alańy qaıta jańǵyrtylmaq. A.S.Pýshkın mýzeıinde Abaı ekspozıtsııasy jasaqtalyp, shaharda jazýshylar alleıasyn ashý josparlandy.
H.Bókeeva atyndaǵy qazaq drama teatry M.Áýezovtiń «Abaı» spektaklin jurtshylyq nazaryna usynbaqshy. Abaıdyń aýdarmalary boıynsha qýyrshaq teatry balabaqsha búldirshinderine arnap qoıylymdar qoıady.
Ǵ.Qurmanǵalıev atyndaǵy oblystyq fılarmonııasynyń Dáýletkereı atyndaǵy qazaq halyq aspaptar orkestri men QR eńbek sińirgen qaıratkeri Qatımolla Berdiǵalıevtiń «Abaı ánderi» atty kontserti de uıymdastyrylady.
Aıta keteıik, buǵan deıin Abaıǵa arnalǵan eskertkish Oral qalasy men Tasqala aýdany ortalyǵynda boı kótergen bolatyn.