Aqsaı qalasynda 4 adam vahtalyq jumysqa jalǵan vaktsına pasportymen kelgen

ORAL. QazAqparat – Aqsaı qalasynda 4 adam vahtalyq jumysqa jalǵan vaktsına qujatymen kelgen, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkendeı, qazirgi kezde QR QK 385-babyna (jalǵan qujattardy qoldan jasaý, daıyndaý nemese ótkizý) sáıkes sotqa deıingi tergeý amaldary júrgizilýde.

Atalǵan bap boıynsha aıypty dep tanylǵan adamǵa 4 jylǵa deıin bas bostandyǵyn shekteý jazasy qarastyrylǵan.

Polıtsııa qyzmetkerleri anyqtaǵanyndaı, jalǵan vaktsına qujatyn paıdalanǵandar myńdaǵan adam jumys isteıtin nysanda qyzmet atqarǵan. Osylaısha olar basqalardyń ómirine qaýip tóndirgen.

Eske sala keteıik, budan buryn Batys Qazaqstanda jalǵan vaktsına qujatyn paıdalanǵan adamnyń ustalǵanyn, BQO-da sońǵy tórt táýlikte 335 adamnan indet anyqtalǵanyn jazǵan bolatynbyz.

Sondaı-aq Batys Qazaqstanda 209 myńǵa jýyq adam koronavırýsqa qarsy vaktsına saldyrdy.