Aqparattyq qaýipsizdik ókili EKSPO-2017 kezindegi kıbershabýyldar týraly aıtty

ASTANA. QazAqparat -  «EKSPO-2017» kórmesi kezindegi hakerlik shabýyldarda aıtarlyqtaı erekshelik bolmady. Bul týraly búgin Astanada kıbershabýyldarǵa tosqaýyl qoıýǵa arnalǵan forýmda Qorǵanys jáne aeroǵarysh mınıstrligi Aqparattyq qaýipsizdik komıteti tóraǵacynyń orynbasary Rýslan Ábdiqalyqov málim etti, dep habarlaıdy QazAqparat.

«Eger de týrasyn aıtsaq, atalǵan máselede biz úshin eshqandaı jańalyq bolǵan joq. Sebebi kıberqylmyskerler is-qımyly salasyndaǵy sońǵy úrdisterge qarasaq, osyndaı aýqymdy ári mańyzdy sharalarǵa shabýyl jasaý burynǵydaı qyzyq bolmaı qaldy. Shynymen de shabýyldar jasaldy, osy oraıda táýlik boıy jaǵdaıdy baqylap otyrýǵa týra keldi, sondaı-aq tehnıkalyq qyzmet bul shabýyldarǵa tótep bere aldy. Osy jumystardyń barlyǵy qarbalas rejimde ótti. Degenmen de osy hakerlik shabýyldardyń barlyǵy túsinikti boldy jáne bul turǵyda eshqandaı da erekshelikti baıqamadyq», - dedi R. Ábdiqalyqov.

Budan buryn habarlanǵandaı, ótken jyly tamyzda «EKSPO-2017» halyqaralyq mamandandyrylǵan kórmesiniń resmı saıtyna hakerlik shabýyl jasalǵan. 

 «20 tamyz kúni saǵat 23:00 keıin (Astana ýaqytymen) expo2017.astana.com saıty ornalasqan serverge aýqymdy Ddos-shabýyl jasalǵany tirkeldi. Zııankester ártúrli IP-meken jaılarynan saıtqa úlken júktemeni jasaı otyryp (sekýndyna 20 myń ótinimnen joldaý), serverdi isten shyǵarýǵa áreket jasady. Tehnıkalyq qyzmettiń birlesken jumysy arqasynda serverdiń jumysy tolyq qalpyna keltirildi. Ddos-shabýylynyń barlyq derekteri arnaıy qyzmetterge jiberildi», - delingen taratylǵan habarlamada.