Aqparattyq qaýipsizdik mamandaryn daıarlaıtyn kıberpolıgon qurylmaq

NUR-SULTAN. QazAqparat – Qazaqstanda aqparattyq qaýipsizdik mamandaryn daıarlaý úshin kıberpolıgon qurý josparlanýda. Bul týraly QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Ashat Orazbek aıtyp berdi, dep habarlaıdy QazAqparat.

Vıtse-mınıstrdiń aıtýynsha, 2021-2022 jyldarǵa arnalǵan «Aqparattyq qaýipsizdik» mamandyǵy boıynsha bilim granttarynyń sany 2632-ge deıin artty.

«Buǵan deıin 500 grant, tipti 2017-2028 jyldary 100-ge jýyq grant qana bolatyn. Al qazir Bilim mınıstrligi stýdentterge osy mamandyqtar boıynsha bilim alý úshin 2632 grant bóledi. 2020-2021 jyldary Aqparattyq qaýipsizdik salasynda 542 maman oqytyldy, tórt maman «Bolashaq» halyqaralyq baǵdarlamasy boıynsha sheteldik jetekshi joǵary oqý oryndarynda taǵylymdamadan ótti», - dedi Ashat Orazbek Parlament Májilisiniń Halyqaralyq ister, qorǵanys jáne qaýipsizdik komıtetiniń otyrysynda.

Spıkerdiń sózinshe, Tsıfrlyq damý, ınnovatsııalar jáne aeroǵarysh ónerkásibi mınıstrligi bıznes-qaýymdastyqpen birlesip, aqparattyq qaýipsizdik mamandaryn daıarlaý jáne qaıta daıarlaý boıynsha kıberpolıgon alańyn qurý boıynsha jumys istep jatyr.

«IT salasy óte jyldam damyp keledi, aqparattyq qaýipsizdik te bárin qýyp jetip keledi, sondyqtan adam óz salasynyń naǵyz mamany atanýy úshin JOO bilimi jetkiliksiz jáne qaıta daıarlaý qajet. Biz aqparattyq qaýipsizdik salasyndaǵy mamandar kezeń-kezeńimen jańa syn-qaterlerge daıyndyqtan jáne qaıta daıarlaýdan óte alatyn alań quramyz», - dedi vıtse-mınıstr.