Aqparat jáne qoǵamdyq damý mınıstrligi meshitterdiń karantınnen keıingi jumysyn talqylady
Mınıstrlikten málim etkendeı , kezdesýde karantın talaptary jeńildetilgen kezde dinı ǵımarattardyń jumys isteý máselesi talqylandy. Bas múftı meshitter ashylǵan jaǵdaıda dinı ǵımarattaǵy qyzmet sanıtarlyq normalardy saqtaı otyryp júrgiziletinin málimdedi. Óz kezeginde vıtse-mınıstr QMDB-nyń meshitterde koronavırýs indetiniń taralýynyń aldyn alý boıynsha biryńǵaı is-qımyl tártibin ázirleýdiń oryndylyǵyn jetkizdi.
M.Ázilhanov memleket pen dinı birlestikterdiń, ásirese pandemııa sııaqty jahandyq syn-qaterler jaǵdaıynda odan ári yntymaqtastyǵy qajettigin atap ótti. Vıtse-mınıstr QMDB tóraǵasyna dindar azamattardyń májbúrli karantındik sharalarǵa túsinistikpen qaraǵany jáne olardyń arasynda sanıtarlyq-epıdemıologııalyq normalardy saqtaýdyń mańyzdylyǵyn túsindirýde memleketke kómekteskeni úshin alǵys aıtty.
Óz tarapynan Bas múftı bıylǵy 31 shilde men 2 tamyz aralyǵynda ótken Qurban aıt merekesi kezinde mınıstrliktiń kórsetken qoldaýyna alǵys bildirdi.
«Mınıstrliktiń kómegimen Dinı basqarmanyń «Qurban2020.muftyat.kz» arnaıy saıty iske qosyldy, sonyń arqasynda azamattar qashyqtan qaıyrymdylyq jasaı alǵanyn nazarǵa salamyz. Jalpy, Qazaqstan boıynsha mereke kezinde 80 myńnan astam muqtaj adam qurbandyq etin aldy.
Sondaı-aq, taraptar destrýktıvti dinı aǵymdardyń yqpalyna túsken azamattar arasynda túsindirý jumystaryn júrgizý máselelerin talqylady», - delingen vedomstvo aqparatynda.