Aqparat jáne qoǵamdyq damý mınıstrligi «Meloman» dúkender júıesimen birge baıqaý jarııalady

NUR-SULTAN. QazAqparat - Elbasynyń «Rýhanı jańǵyrý» baǵdarlamalyq maqalasyn júzege asyrýdy kitap dúkenderiniń iri júıesi qoldap, «Kitap oqyp, rýhanı baı bol!» respýblıkalyq baıqaýynyń bas seriktesteriniń biri boldy, dep habarlaıdy QazAqparat.

Mega Silk Way saýda ortalyǵynda QR Aqparat jáne qoǵamdyq damý mınıstrligi men «Meloman» kompanııasynyń ózara yntymaqtastyq jóninde memorandýmǵa qol qoıyldy.

«Elbasynyń «Rýhanı jańǵyrý» baǵdarlamalyq maqalasynyń basty baǵyttarynyń biri «Bilimniń saltanat qurýy» ekendigi jáne osy baǵyttyń tulǵanyń ári qaraı damýyna, básekege qabiletti bolýyna múmkindik beretindigi belgili. Osy rette kitap oqýdyń mańyzdylyǵy erekshe. Sondyqtan da jobanyń bas seriktesteriniń biri – «Meloman» kompanııasy bolyp otyr»,- dep Aqparat jáne qoǵamdyq damý vıtse-mınıstri Danııar Esın atap ótti.

«Meloman» kompanııasynyń Nur-Sultan qalasy boıynsha fılıalynyń dırektory Anna Valentovanyń pikirinshe, jalpy qazaqstandyq qoǵamnyń áleýetiniń artýy zııatkerlik kapıtaldyń damýyna baılanysty. «Bizdiń komanda bul jobany qýanyshpen jáne maqtanyshpen qoldap, «Rýhanı jańǵyrý» baǵdarlamalyq maqalasynyń basty baǵyttarynyń biri - «Bilimniń saltanat qurýynyń» damýyna úles qosýǵa daıyn. Kitap oqýdy nasıhattaý qajet ári mańyzdy. Sondyqtan da oqyńyz jáne odan ári damyńyz»,-dep atap ótti Anna Valentova.

«Kitap oqyp, rýhanı baı bol!» respýblıkalyq baıqaýy astanalyq jastardyń erekshe qyzyǵýshylyǵyn týdyrdy. «Meloman» alańynda jas aqyndar óz avtorlyq shyǵarmalaryn oqyp, otandyq jáne sheteldik ádebıet týyndylaryn talqylady. Memorandýmǵa qol qoıý aıasynda Nur-Sultannyń erekshe belsendi saıyskerlerine Danııar Esın syılyq sertıfıkattaryn tartý etti.

Baıqaýǵa kez kelgen tulǵa qatysa alatyndyǵyn esterińizge salamyz. Birinshi kezeń – áleýmettik jelilerdegi estafeta. Qatysýshy shyǵarmadan úzindilerdi mánerlep oqyp, «Rýhanı jańǵyrý» óńirlik jobalyq keńseleriniń

jáne https://www.facebook.com/ruhani.kz, https://www.instagram.com/ruhkz/ ortaq akkaýnttaryn belgilep, ınstagramǵa jeke betine ornalastyrýy qajet, sondaı-aq baıqaýdyń arnaıy heshtegterin #RuhaniJangyry #KitapOqypRuhaniBaiBol paıdalanýy kerek.

Ekinshi kezeńge áleýmettik jelilerde eń kóp laıktar men repost jınaǵan qatysýshylar ótedi. Olar úshin «Meloman», «Marvın» óńirlik kitap dúkenderiniń birinde nemese uıymdastyrýshy aıqyndaǵan basqa orynda kórkem kitaptardy tereń uǵynýǵa baǵyttalǵan pikirtalastar uıymdastyrylady. Qazylar alqasynan alǵan upaılaryna saı, úzdikter aqtyq kezeńge ótedi.

Baıqaý 2020 jyldyń 1 aqpanynan deıin jalǵasady.