Aqparat jáne qoǵamdyq damý mınıstrligi granttyq jobalarǵa 3,4 mlrd teńge bóldi
«2019 jyly mınıstrlikte úkimettik emes uıymdardy qoldaý maqsatynda granttyq qarjylandyrý aıasynda 125 jobany iske asyrýǵa 3,4 mlrd teńge qarastyrylǵan. Jobalardyń bir bóligi júzege asyrylyp jatyr. 54 joba boıynsha grant alýshylar anyqtaldy, kelisimshart jasaýǵa qujattar daıyndalýda», - dedi Aqparat jáne qoǵamdyq damý vıtse-mınıstri Juldyz Omarbekova grant alýshylarmen kezdesý barysynda.
Vıtse-mınıstr qoıylǵan mindetterdi sapaly júzege asyrý jáne túpkilikti nátıjelerge qol jetkizý qajettigin atap ótti.
«Ár qazaqstandyq sizderdiń jobalaryńyzdyń áserin sezinýi kerek. Mınıstrlik tapsyrys berýshi retinde barlyq qujattarǵa, tehnıkalyq sıpattamalarǵa, baǵalaý jáne josparly jumys kestelerine tolyq taldaý júrgizetin bolady. Jaqynda ǵana QR Prezıdenti Qasym-Jomart Kemeluly Toqaev sybaılas jemqorlyqty joıýdyń jáne bıýdjet qarajatyn paıdalanýdyń tıimdiligin arttyrý boıynsha naqty sharalardy atap ótti. Osyǵan baılanysty, siz ben bizdiń mindetimiz - qoǵamda kez kelgen sybaılas jemqorlyq áreketterge «nóldik tózbeýshilikti» qalyptastyrý. Biz maksımaldy ashyqtyqqa umtylamyz. Osy jyldan bastap biz qoǵamdyq ıgilikke qarjylyq jáne shyǵarmashylyq esepterdi jarııalaýǵa mindetti talaptardy engizdik. Árbir tıyn sanaýly. Eger Siz 15 qalam satyp alyndy deseńiz, barlyq sáıkes chekter usynylýy qajet», - dedi ol.
Vedomstvo basshysynyń orynbasary jobalar aıasynda qarajattyń jumsalýyn ÚEU ózderi de, el azamattary da qadaǵalaı alatynyn aıtty. Osylaısha, grant alýshylardyń jáne Azamattyq bastamalardy qoldaý ortalyǵynyń saıttarynda jobalardy iske asyrý boıynsha barlyq esepter jarııalanatyn bolady. Sonymen qatar, J.Omarbekovanyń aıtýynsha, grant alýshylar BAQ jáne áleýmettik jeliler arqyly ótkiziletin is-sharalar týraly halyqty turaqty túrde habardar etýi tıis.
Sondaı-aq J.Omarbekova Jastar jyly aıasyndaǵy is-sharalarǵa toqtalyp ótti. «Túrli baǵyttar boıynsha 49 jobany júzege asyrý qarastyrylǵan. Bul bilim, jumyspen qamtý, jastar kásipkerligi, bos ýaqyt, otbasy ınstıtýtyn nyǵaıtý, daryndy jastardy qoldaý jáne taǵy basqalary. Osy maqsattarǵa 2,8 mlrd teńge bólindi. Mysaly, sottar janynan 8 óńirde (Joǵarǵy sotpen birlesip) «Baqytty otbasy» resýrstyq qoldaý ortalyqtarynyń qyzmeti uıymdastyrylady, biryńǵaı call-ortalyq qurý arqyly «Quqyq qorǵaýshy» keshendi jobasy iske asyrylady. Alǵash ret «Qazaqstandyq otbasylar - 2019» Ulttyq baıandamasy ázirlenedi», - dedi ol.
ÚEU granttyq qarjylandyrý salasyndaǵy operator - «Azamattyq bastamalardy qoldaý ortalyǵy» KEAQ.
«Azamattyq bastamalardy qoldaý ortalyǵynyń» Basqarma tóraǵasy Batıma Mýkına jınalysqa qatysýshylardy granttyq jobalardy iske asyrý tetikteri, bıýdjet qarajatyn tıimdi paıdalaný sharalary týraly habardar etti.