Aqparat mınıstrligi jýrnalıst Sandýǵash Dúısenova isine qatysty pikir bildirdi
«Jýrnalıst Sandýǵash Dúısenovanyń ustalǵany rastaldy. Aqparat jáne qoǵamdyq damý mınıstrligi oqıǵa bolǵan sátten ishki ister organdaryna habarlasyp, máseleniń mán-jaıyn bildi. Jetisý oblystyq polıtsııa departamentiniń málimetinshe, Sandýǵash Taldyqorǵanda jeke ómir málimetterin taratý týraly aryz boıynsha ustalyp, eshqaıda ketpeý jáne tıisti minez-qulyq týraly qolhatpen shyǵarylǵan. Qazirgi tańda tergeý jumystary júrgizilip jatyr. Mınıstrlik máseleni nazarda ustaıdy jáne jýrnalıske qandaı da quqyqtyq kómek kórsetýge daıyn», - dep jazdy mınıstrliktiń baspasóz hatshysy Nurbek Amısha Facebook jelisinde.
Eske sala keteıik, 11 tamyzda jetisýlyq jýrnalıst, azamattyq belsendi Sandýǵash Dúısenova ustalǵan edi.
Oǵan QR Qylmystyq kodekstiń 147-baby 5-bóligi boıynsha aıyp taǵylǵan. Bul bapta adamnyń jeke ómiri týraly aqparatty taratqandarǵa jaza qarastyrylǵan.
Keıin bosap shyqqan jýrnalıst ózin polıtseıler bólimshede sheshindirip, vıdeoǵa túsirgenin jetkizdi.
Osyǵan oraı Jetisý oblystyq PD málimdeme jasap, nelikten vıdeoǵa túsirgenin túsindirdi.